Elordadaǵy №6 qalalyq emhanada QR Densaýlyq saqtaý vitse-ministri – Bas memlekettik sanitar dáriger Erlan Qiiasov pen Densaýlyq saqtaý vitse-ministri Ajar Ǵiniiat koronavirýsqa qarsy vaktsina saldyrdy, dep habarlaidy "Ult aqparat".
Vitse-ministrlerge reseilik Sputnik V vaktsinasy egildi. Egýden buryn olar tekserýden ótti jáne vaktsinaǵa qarsy kórsetilim joq ekeni anyqtaldy. Aldymen vaktsinany Erlan Qiiasov, odan keiin Ajar Ǵiniiat aldy.
Sonymen birge dárigerler vaktsinalaýdan keiin qandai saqtyq sharalaryn ustaný keregin túsindirdi jáne egýden keiin vitse-ministrler emhanada jarty saǵat dárigerler baqylaýynda boldy.
«Men únemi vaktsina alamyn. Bul – eń tiimdi qorǵanys quraly, sondyqtan vaktsinaǵa qol jetkizgen alǵashqy elderdiń biri bolǵanymyzǵa qýanýymyz kerek. Jeke ózim vaktsina arqyly meditsina mamandaryn, tutas halyqty qorǵai alatynymyzǵa qýandym. Reseilik, qazaqstandyq vaktsinalarǵa kelsek, barlyq vaktsinanyń qorytyndysy bir – aǵzada koronavirýs infektsiiasyna qarsy immýnitet/antideneler paida bolady. Vaktsina salarda da esh ýaiymdaǵan joqpyn. Óitkeni men dárigermin jáne vaktsinalyq preparattardyń artyqshylyqtary men keri áserlerinen habardarmyn», - dedi Ajar Ǵiniiat tilshilerge bergen suhbatynda.
Aita keteiik, búgin Qazaqstanda koronavirýs infektsiiasyn juqtyrý jáne taratý táýekeli joǵary sanattardy koronavirýsqa qarsy vaktsinalaý bastaldy. Qazaqstanda vaktsina erikti túrde salynady.
Odan keiin 15 aqpannan bastap, vaktsinalaý protsesine Qaraǵandy farmatsevtikalyq kesheniniń bazasynda óndirilgen Gam-KOVID-Vak vaktsinasy qosylady.
Al 2021 jyldyń 2 toqsanynan bastap vaktsinalaý protsesine qazaqstandyq – QazCovid-In preparatyn qosý josparlanyp otyr. Bul vaktsina qazirgi ýaqytta klinikalyq synaqtyń 3-kezeńinen ótýde. 31 qańtarda Qaraǵandy farmatsevtikalyq kesheni elge «Spýtnik V» vaktsinalarynyń alǵashqy partiiasyn jetkizdi.
