Búgin QR Densaýlyq saqtaý vitse-ministri Kamaljan Nadyrov «Azamattardy qabyldaýdyń biryńǵai kúni» jalpyrespýblikalyq is-sharasy aiasynda azamattardy jeke qabyldady, dep habarlaidy "Ult aqparat" ministrliktiń baspasóz qyzmetine silteme jasap.
Túske deiin barlyǵy 30-dan astam adam qabyldandy, sonyń qatarynda beinekonferentsiia arqyly bailanysqa shyqqan Nur-Sultan, Almaty, Shymkent qalalarynyń, Shyǵys Qazaqstan, Jambyl, Atyraý, Almaty oblystarynyń turǵyndary bar.
«Jalpy, ótinishter meditsinalyq qyzmet kórsetý sapasy, dári-dármekpen qamtamasyz etý, shetelde emdelý, ǵylymi ortalyqtarda meditsinalyq tekserý, konsýltatsiialyq kómek kórsetý jáne ońaltý, meditsinalyq personalǵa shaǵymdar jáne basqalar máseleler qaraldy», delingen habarlamada.
Bul is-shara Memleket basshysynyń mindetterin iske asyrý aiasynda ótýde. «Azamattardy qabyldaýdyń biryńǵai kúniniń» mindeti – azamattardyń naqty áleýmettik máselelerin sheshýge baǵdarlanyp, halyqpen tikelei dialogty nyǵaitý.
Azamattardy qabyldaý qorytyndysy boiynsha vitse-ministr tiisti densaýlyq saqtaý basqarmalarynyń, taýarlar men qyzmetterdiń qaýipsizdigin baqylaý komitetiniń basshylaryna, Densaýlyq saqtaý ministrliginiń qurylymdyq jáne vedomstvolyq baǵynysty bólimsheleriniń basshylaryna máselelerdi sheshý úshin birqatar tapsyrma berdi.
Qabyldaý áli jalǵasýda.
Aita keterligi, QR Densaýlyq saqtaý ministri Eljan Birtanov bastaǵan delegatsiia Ózbekstan astanasynda ótip jatqan Qazaqstannyń meditsina kúnderine qatysýda.
