Elimizdiń Densaýlyq saqtaý ministrligi dárihanalardy tekserýdi kúsheitpek. Mundai shara «Densaýlyq saqtaý máseleleri boiynsha QR-nyń keibir zańnamalyq aktilerine ózgertýler men tolyqtyrýlar engizý týraly» zań jobasynda qarastyrylǵan, dep habarlaidy QazAqparat tilshisi.
Búgin QR Parlamenti Senaty Áleýmettik-mádeni damý komitetiniń keńeitilgen otyrysynda Densaýlyq saqtaý vitse-ministri Aleksei Tsoi atalǵan zań jobasy aiasynda dári-dármekti retseptsiz berýmen kúres qalai kúsheitiletindigin aitty.
«Aitalyq, dári-dármektiń retseptisiz satylatyndyǵyn tekserý úshin 30 kún buryn dárihanalarǵa kelip tekserý júrgizetindigimizdi eskertýimiz qajet. Tekserýge bir kún qalǵanda taǵy da eskertýge tiispiz. Bizdiń mamandar tekserýge kelgen kúni dárihananyń retseptsiz satpaityndyǵy belgili. Bitti, osydan keiin atalǵan dárihanany 3 jylǵa deiin teksere almaimyz. Iaǵni, bul paidasyz jumys. Ekinshiden, patsient shaǵym jasaýy kerek. Mundai shaǵym da joq, eshkim bermeidi. Demek, bul norma jumys istemei tur», - dedi zań jobasyn tanystyrǵan Aleksei Tsoi.
Sondyqtan onyń sózine qaraǵanda, bul máselege Densaýlyq saqtaý ministrligi qoǵamdy tartýǵa niet tanytyp otyr. Iaǵni, qoǵamdyq monitoringileý toptary, Úkimettik emes uiymdar memlekettik tapsyrys aiasynda dárihanalardy tekserip, buzýshylyqtar týraly habarlaityn bolady.
Munan bólek, ministr dári-dármek shyǵaratyn kompaniialardyń keibir dárigerlerge ózi ónimderin tyqpalaityndyǵyna da toqtaldy.
«Qazirgi ýaqytta dári-dármekti naryqta saýdalaýdyń ádep kodeksin engizýdi josparlap otyrmyz. Ol jaqta lobbileý jii oryn alady. Farmatsevtikalyq kompaniialar dárigerlerdi yryqtaryna kóndirip alady. Sondyqtan biz arnaiy normamen jumys kúni ýaqytynda dárigerlermen jeke keńes ótkizýge tyiym salamyz», - dedi Aleksei Tsoi.
