Densaýlyq saqtaý ministri Eljan Birtanov Ońtústik Koreia, Italiia, Iran jáne Japoniia memleketterimen qarym-qatynasty tómendetip, ushaqtar men jolaýshy tasymalyn azaitý kerektigin aitty, dep habarlaidy QazAqparat.
«Basqa memleketter boiynsha búgin vedomstvoaralyq shtab otyrysy bolady. Bizdiń usynysymyz Ońtústik Koreia, Italiia, Iran jáne Japoniia memleketterimen qarym-qatynasty tómendetip, ushaqtar men jolaýshy tasymalyn azaitý kerek. Onyń sebebi osy memleketterde keiingi úsh kúnde koronavirýs infektsiiasymen aýyrǵandar sany kóbeiip kele jatyr. Bizdiń azamattarǵa taǵy da eskerte ketsem, ásirese Koreiaǵa barýshylarǵa – qazir onda barýǵa bolmaidy. Óte qaýipti», - dedi Eljan Birtanov Úkimet otyrysynan keiin tilshilerge.
Onyń aitýynsha Ońtústik Koreiada zańsyz jumys istep jatqan otandastarymyzdyń máselesi de vedomstvoaralyq komissiiada qaralmaq.
«Muny biz bilemiz. Bizdiń azamattarymyz kóp. Emdelýge barǵandar, týris bolyp barǵandar, jumys istep jatqandar da bar. Olardyń elge qaitýyna múmkindik berýimiz qajet. Biraq barlyq azamattar tolyq tekseriletin bolady», - dedi ol.
Eljan Birtanov halyqtyń karantindik sharalardy durys túsinbeýi alańdatatynyn aitty.
«Mundai oqiǵaǵa kóptegen elder tap bolyp jatyr. Azamattarǵa taǵy bir ret júgingim keledi. Karantinge jatqyzylǵan adamdar naýqas bolyp sanalmaidy. Bul qaýipsizdik sharasy. Biz 20 aqpannan beri syrttan kelgen azamattarǵa ózdiginen oqshaýlanýǵa keńes berip otyrmyz. Dostardan, áriptesterden oqshaýlaný qajet. Bul búkil álemde qoldanylyp otyrǵan tájiribe. Kóptegen elder arnaiy karantindik oryndarmen qatar úide oqshaýlaný sharalaryn da usynyp jatyr. Óitkeni barlyǵyn arnaiy orynǵa ornalastyrý múmkin emes. Baibalam týǵyzdyń qajeti joq ekenin aitqym keledi. Qajetti sharanyń bári jasalyp jatyr. Bul aýrýdy emdeý múmkindigi bizde bar. Dei turǵanmen aýrý bailanys arqyly tez juǵady», - dedi ol.
