QR Densaýlyq saqtaý ministri Eljan Birtanov óńirdegi densaýlyq saqtaý basqarmalaryn qaitadan ministrlikke baǵyndyrý máselesin kóterdi, dep habarlaidy QazAqparat.
«Halyqtyń densaýlyǵyn saqtaý men meditsinalyq kómek sapasyn arttyrýdyń negizgi máseleleri jergilikti atqarý organdarynyń quzyrynda bola tura, qarajat jetkilikti bola tura, memlekettik baǵdarlama sharalarynda alshaqtyq týyp, óńirlerde oryndalmasa, qisyndy suraq týyndaidy. Jalpy jabdyqtaýǵa 49 mlrd teńge bólinedi. Keibir ákimdikter jylyna 1-6 mlrd teńgeni materialdyq jabdyqtaýǵa jumsaidy», - dedi Eljan Birtanov elordada ministrlik alqasynyń keńeitilgen otyrysynda.
Ministr qarajat pen normativti-quqyqtyq bazanyń jáne JOO bar ekenin aityp, sáikesinshe, atqarý tártibi jóninde másele týyndaitynyn jetkizdi.
«Densaýlyq saqtaý basqarmalaryn Densaýlyq saqtaý ministrligine qaita baǵyndyrý máselesin kóteremiz. Muny Úkimet pen Prezident Ákimshiligine deiin jetkizemiz. Kelesi memlekettik baǵdarlamalardyń nege oryndalmaǵany týraly Sizderdi turǵyzyp, surap otyrǵymyz kelmeidi. Densaýlyq saqtaý basqarmalarynyń basshysyn ministrlik taǵaiyndaityn burynǵy júieni qaitarý kerek», - dedi Eljan Birtanov.
Aita keteiik, elordada 2019 jyldyń jartyjyldyǵyna arnalǵan QR Densaýlyq saqtaý ministrligi alqasynyń otyrysy ótip jatyr. Otyrysta 2016-2019 jyldary densaýlyq saqtaýdy damytýǵa arnalǵan «Densaýlyq» memlekettik baǵdarlamasy, 2019-2020 jyldardy qamtityn bastapqy meditsinalyq-sanitarlyq kómekti damytý sharalarynyń jospary, 2019 jylǵa arnalǵan QR ana ólimin azaitý boiynsha jedel jospar, 2019-2021 jyldarǵa arnalǵan balalar ólimin azaitý boiynsha sharalar jospary, kadrlyq qamtamasyz etý jáne densaýlyq saqtaý salasynyń qyzmetkerlerin áleýmettik qoldaý, densaýlyq saqtaý salasyna investitsiialar tartý máselesi qaralady.
