Qazaqstannyń densaýlyq saqtaý ministrligi Meta kompaniiasymen birlesip Facebook platformasynda qan donorlyǵy jobasyn iske qosady, dep habarlaidy Sputnik Qazaqstan.
Ministrlik aqparatyna sáikes, bul bastama qazaqstandyqtardy donor bolýǵa yntalandyrady.
"Facebook eldegi qan qoryn tolyqtyrýǵa kómektesý maqsatynda Qazaqstannyń densaýlyq saqtaý ministrligimen seriktes boldy. Bul joba adamdardy donorlyqtan habardar etip, donor bolý joldaryn izdeýdi jeńildetedi", - dedi Meta kompaniiasynyń ókilderi.
Birneshe sekýnd saiyn Qazaqstanda adam ómirin qutqarý úshin qan quiý qajet bolady, al bir donor úsh adamnyń ómirin saqtap qalýy múmkin.
Ministrlik aqparatyna sáikes, kóp jaǵdaida adamdar qandy qaida jáne qashan tapsyrýǵa bolatynyn bilmeidi. Facebook donor bolý joldary, pýnkterdiń qaida ornalasqanyn, osy taqyryptaǵy is-sharalar týraly aqparatty tezirek tabýǵa kómektesetin fýnktsiiany usyndy.
"Densaýlyq saqtaý júiesi úshin qan qoryn saqtaý aýqymdy másele ekenin bilemiz. Qazaqstanda osy fýnktsiiany iske qosý arqyly qan donorlarynyń sanyn kóbeitip, naýqastardy qanmen turaqty túrde qamtamasyz etýge úles qosa alamyz dep úmittenemiz", - dedi Qytai, Taivan, Singapýr, Mońǵoliia jáne Ortalyq Aziianyń Meta kompaniiasynyń memlekettik saiasat jónindegi basqarýshy direktory Djordj Chen.
Densaýlyq saqtaý ministri Aleksei Tsoi Facebook bul mańyzdy joba ekenin atap ótti.
"Pandemiia kezinde donorlyq belsendilik birshama tómendedi, adamdar meditsinalyq uiymdarǵa az bara bastady. Birlesken kúsh-jigerimizdiń arqasynda qan men onyń komponentteri tapshylyǵyna jol bermeýimiz kerek. Áleýmettik jelidegi osy jahandyq joba eldegi qan qoryn arttyrýǵa kómektesedi dep senemin", - dedi Aleksei Tsoi.
Aita keteri, bul fýnktsiia 18-65 jas aralyǵyndaǵy adamdarǵa Facebook-te qan tapsyrý týraly aqparat alýǵa, jergilikti qan tapsyrý ortalyqtarynda qan tapsyrý múmkindigi týraly habarlamalar alýǵa jáne dostaryn qan tapsyrýǵa shaqyrýǵa múmkindik beredi.
Facebook bul aqparatty jańalyq arnalarynda habarlaý arqyly taratady nemese qoldanýshylar ony Facebook-ten "Qan tapsyrý" suranysy boiynsha taba alady.
