Almaty qalalyq qoǵamdyq densaýlyq saqtaý basqarmasynyń jetekshisi Tileýhan Ábildaevtyń aitýynsha, koronavirýs tabylǵan 17 naýqastyń jaǵdaiy ortasha. Olardyń 14-i - qalalyq juqpaly aýrýlar aýrýhanasy, eki bala jáne bir balanyń anasy (odan da koronavirýs tabylǵan) balalar juqpaly aýrýlar aýrýhanasynda jatyr.
- Olardyń báriniń jaǵdaiy - ortasha. Eshqaisysy jasandy tynys alý apparatyna qosylmaǵan, - dedi Tileýhan Ábildaev.
18 naýryzda Qazaqstan densaýlyq saqtaý ministrligi Almatyda taǵy eki adamnan koronavirýs tabylǵanyn aityp, elde virýs juqtyrǵandar sanynyń 35-ke jetkenin habarlaǵan edi.
Densaýlyq saqtaý ministrliginiń resmi ókili Dias Ahmetsháriptiń aitýynsha, birinshi naýqas - 1998 jylǵy stýdent qyz Stambýl - Almaty baǵyty boiynsha 15 naýryzda ushyp kelgen. Ekinshi naýqas - 1974 jylǵy áiel Máskeýden Almatyǵa 10 naýryzda kelgen.
Tileýhan Ábildaevtyń aitýynsha, qazir bul eki adammen sońǵy kezde aralasqan adamdar izdestirilip jatyr. Onyń sózine qaraǵanda Túrkiia koronavirýsqa bailanysty "qaýipti elder" qataryna kirmegendikten Stambýldan kelgen stýdent qyz karantinge birden jatqyzylmaǵan.
"Ol ózi túnde jedel járdem qyzmetine habarlasqan. Dárigerler jedel respiratorlyq virýstyq infektsiia belgilerin tappaǵan. Biraq aýrýhana qyzmetkerleri tańǵa qarai qanyn teksergen. Diagnoz rastaldy" dedi ol.
