Almatyda Denis Tenniń ólimine qatysty sot bastaldy. Búgingi otyrysta sotqa deiingi tyńdalym barysynda kúdiktilerdiń jeke məlimetteri belgili boldy, dep habarlaidy QazAqparat tilshisi.
QR Qylmystyq kodeksiniń 434-baby, QR QK 24-babynyń 3-bólimi, 188-babynyń 2-bóliminiń 1-tarmaǵy boiynsha aiyptalǵan Janar Tolybaeva joǵary bilimdi, Taraz innovatsiialyq gýmanitarlyq ýniversitetin bastaýysh mektep muǵalimi mamandyǵymen aiaqtaǵan.
23 jastaǵy kelinshek óz sózinde 4 jastaǵy balasy bar ekenin, ekinshi balasyna júkti ekendigin aitty.
«Men - Ózbekstan Respýblikasynyń týmasymyn. Qazir Qazaqstan azamatshasymyn. Ajyrasqanmyn, 4 jastaǵy balam bar, ekinshisine júktimin, 6,5 ai boldy», - dedi Janar Tolybaeva.
Al QR QK 188-baby 2-bóliminiń 1-tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Arman Qudaibergenov buǵan deiin kólik jýý ornynda jumys istegen. Buryn QR QK-niń 178-babynyń 2-bólimimen isti bolǵan.
Qylmystyq is 38 tomnan turady.
Eske salsaq, Denis Tendi biyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denis Tenniń ólimine qatysty qylmystyq is qozǵalyp, kúdiktiler izdestirildi. Elbasy Denis Tenge qatysty qylmysty muqiiat tekserýdi tapsyrdy. Keiin QR IIM kúdiktilerdiń ustalǵanyn jariia etti.
Eske sala ketsek, qyrkúiek aiynyń sońynda Ishki ister ministri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.
