Politsei betinen uryp jibergen – Janar Tolybaeva soqqyǵa jyǵylǵany týraly anyqtamasy bar ekenin aitty, dep habarlaidy Sputnik agenttigi.
Kúdikti Janar Tolybaeva ustalǵan boida Almaty aýdandyq ishki ister bólimine jetkizilgen. Sol kezde oǵan Qudaibergenov habarlasypty.
Quqyq qorǵaýshylar onyń nómiri arqyly qaida júrgenin anyqtaidy. Qudaibergenovti qamaýǵa alǵan kezde, Tolybaeva politsiia kóliginde bolǵan.
"Meni Almaly aýdandyq ishki ister bóliminde tergep, keiin qoia berdi. 21 shildede Almaty politsiia departamentine shaqyrdy, sol kezde maǵan kim kimge pyshaq salǵanyn ait dep qysym kórsetti. Arman bárin moiyndady dedi. Sodan soń politsei bir býma qaǵazdy orap, betimnen ura bastady", — dep málimdedi Tolybaeva juma kúni sot otyrysynda.
Onyń aitýynsha, soqqyǵa jyǵylǵanyn dáleldeitin qujatty usynǵan eken.
"Uryp-soǵý týraly anyqtamam bolǵan, biraq ony is materialyna qospady. Kógergen jerlerim jazylyp ketti. Meni kim urǵanyn da bilmeimin, olardy buryn kórmegen edim", — dep Tolybaeva sottan buryn bergen túsiniktemelerin qaita oqyp shyǵýdy surady.
Sotta Tolybaeva politsiia qyzmetkerleriniń kinásin moiyndap, protsestik kelisimge kelýdi usynǵanyn málimdedi.
"Eki bap boiynsha kinámdi moiyndasam, protsestik kelisim jasasamyz dedi. Shartty túrde jaza merzimin alatynymdy habarlady. Basynda kelisip edim, keiin tergeýshi Denis Tenniń anasy qarsy dedi. Maǵan shartty merzim bermeitin bolsa, jasamaǵan qylmys úshin nesine jaýapkershilik alamyn? Asa aýyr qylmys úshin aiypty moiyndaýdan bas tartamyn, sebebi oǵan aralasqan joqpyn", — deidi Tolybaeva.
Ol Oksana Tennen keshirim surady. "Men bárińizden keshirim suraimyn. Bul qaiǵy Oksana Alekseevnanyń basyna ǵana túsken joq, búkil Qazaqstannyń qabyrǵasy qaiysty. Basqa aitarym joq", — dep oiyn qorytty sottalýshy.
Denis Tenniń ólimine qatysty sot
Almaty qalasynyń qylmystyq ister boiynsha mamandandyrylǵan aýdanaralyq sotynda qazaqstandyq mánerlep syrǵanaýshy Denis Tenniń ólimine qatysty is boiynsha basty sot talqylaýy ótip jatyr.
Sottalýshylar – Arman Qudaibergenov, Nuraly Qiiasov jáne Janar Tolybaeva. Bastapqy eki kúdiktige "Aldyn-ala sóz bailasý arqyly adamdar tobynyń qaraqshylyq jasaýy" jáne "Aldyn-ala sóz bailasý arqyly adamdar tobynyń kisi óltirýi" degen baptar boiynsha aiyp taǵyldy. Al Tolybaeva qylmys týraly habarlamady degen kúdikke ilindi.
Úsh kúdiktige qatysty qylmystyq is 13 jeltoqsanda sotqa tústi. Qylmystyq is 38 tomnan turady.
Qazaqstandyq mánerlep syrǵanaýshy Denis Ten 19 shildede kisi qolynan ajal qushty. Ol kóliginiń ainalaryn urlap jatqan eki jigittiń ústinen túsken bolatyn. Urylardyń sońynan túsken sportshy olarmen tóbelesip, saldarynan birneshe pyshaq jaraqatyn alady. Kóp qan joǵaltqan Denis aýrýhanada kóz jumdy.
