Almatyda qazaqstandyq mánerlep syrǵanaýshy Denis Tenniń ólimine aiypty dep tanylǵan úsh kúdiktige sot úkimi shyqty, dep habarlaidy Sputnik Qazaqstan tilshisi.
Almaty qalasynyń qylmystyq ister boiynsha mamandandyrylǵan aýdanaralyq sotynyń sheshimi boiynsha Nuraly Qiiasov 18 jylǵa, Arman Qudaibergenov 18 jylǵa, al aiaǵy aýyr Janar Tolybaeva 4 jylǵa bas bostandyǵynan aiyryldy.
Qiiasov pen Qudaibergenov jazasyn qaýipsizdigi joǵary mekemede, al Tolybaeva qaýipsizdigi ortasha mekemede óteitin bolady.
"Janar Tolybaeva Qiiasov pen Qudaibergenniń sol kúni pyshaq salǵanyn, jaraqat alǵan ataqty sportshy ekenin bile tura sol kúni Qapshaǵaiǵa demalýǵa ketkeni, qylmysty bile tura quzyrly organdarǵa habarlamaǵany úshin aiypty dep tanylyp otyr. Tolybaevanyń 4 jastaǵy balasy bary jáne aiaǵy aýyr ekeni eskerile kele úkim shyqty", — dedi sýdia Keńshilik Ábildinov.
Arman Qudaibergenov QR Qylmystyq kodeksiniń 188-baby "Urlyq", 192-baby "Qaraqshylyq" jáne 99-baby "Adam óltirý" boiynsha aiypty dep tanyldy. Nuraly Qiiasov "Adam óltirý" jáne "Qaraqshylyq" baptary boiynsha sottaldy. Janar Tolybaeva "Urlyq" baby boiynsha aqtalyp, biraq 434-bap "Qylmys týraly habarlamaý" boiynsha kináli dep tanyldy.
Sot Qudaibergenov pen Qiiasovtan protsessýaldy shyǵyn retinde 1 860 520 teńge óndirýdi úkim etti. Sonymen qatar Qudaibergenovten basqa qylmystyq ister boiynsha jábirlenýshilerdiń paidasyna 510 myń 634 myń teńge óndirildi.
Kýáger politseiler jaýapqa tartyla ma?
Jaryssóz kezinde marqum sportshynyń anasy Oksana Ten kámeletke tolmaǵandardyń isi jónindegi eki inspektordy Azamat Nurpeiisov pen Ádilbek Musaevty salǵyrttyǵy men áreketsizdigi úshin jaýapkershilikke tartý týraly qoldaýhat berdi. Eske sala etsek, politseiler Denis Tenniń sottalýshylarmen tóbelesip jatqanyn kórgenin málimdegen edi. Sotta tártip saqshylary kýáger retinde jaýap berdi.
Oksana Ten qos politseidiń ústinen sybailas jemqorlyqqa qarsy komitetke aryz jazdy, qazirgi tańda is ýaqytsha toqtatylǵan.
"Bul iste men kýáger retindemin, olarǵa eshqandai talap qoia almaimyn. Nege ekeni belgisiz, qazirgi tańda is ýaqytsha toqtatylǵan. Politseiler sol baiaǵydai jumys istep júr, qylmystyq is bolsa da, qyzmetinen shettetilgen joq. Bul iske jábirlenýshi retinde qatysa alýym úshin, isti sybailas jemqorlyqqa qarsy bólimnen basqa organdarǵa berýdi taǵy bir márte talap etemin. Áitpese, bul politseilerdiń ústinen jańa aryz jazamyn", — dedi Oksana Ten jaryssóz barysynda.
Denis Tenniń anasy ulynyń tapsyryspen óltirilgenine senimdi
Oksana Ten sot protsesi kezinde qylmystyń tapsyryspen jasalǵanyna senimdi ekenin málimdedi. Jábirlenýshi taraptyń advokaty Nurlan Óstemirov aldyn ala tyńdalym kezinde 2018 jyldyń 20 shildesinde Astana qalasynda aina urlap ustalǵan Arman Qudaibergendi sotqa deiin qaladan shyqpaý týraly qolhatpen bosatyp jibergen politsiia qyzmetkerlerin jaýapkershilikke tartý týraly shaǵym túsirdi.
Sottalýshy óziniń sońǵy sózinde Denis Tenniń otbasynan keshirim surady. Bastapqyda Qudaibergenov pen Qiiasov kinálaryn moiyndaǵanymen, keiin tek urlyq jasaǵany úshin aiypty ekenin jáne kisi óltirýdi aldyn ala josparlamaǵanyn aityp osy ýaqytqa deiin bergen jaýabyn ózgertedi. Al Janar Tolybaeva sońǵy sózinde óziniń ne úshin aiyptalyp otyrǵanyn túsinbeitinin jetkizdi.
Oksana Ten sot úkim shyǵararda qońyraýlardy teksergennen keiin Tolybaeva men keibir kýágerdiń ortaq tanystary bolǵanyn málimdedi.
"Sotqa deiingi otyrysta jáne sotqa deiingi tergeý barysynda telefon qońyraýlaryn tekserý arqyly Tolybaeva men birneshe tulǵanyń ólimnen birneshe kún buryn sóileskeni belgili boldy. Bul jai ǵana kezdeisoqtyq bolýy múmkin emes", — dedi marqum mánerlep syrǵanaýshynyń anasy.
Qaiǵyly oqiǵa qalai boldy?
Qazaqstandyq mánerlep syrǵanaýshy 2018 jyldyń 19 shildesinde 25 jasynda qaza tapty. Sportshy kóliginiń ainasyn urlaǵandardy toqtatpaq bolǵanda san tusynan pyshaq jaraqatyn aldy.
