Memlekettik aiyptaýshy ultaralyq qaqtyǵysty órshitken Batys Qazaqstan oblysynyń muǵalimi Sherhan Baizenovti jalpy rejimdegi koloniiaǵa úsh jylǵa qamaýdy surady, dep habarlaidy Sputnik agenttigi "Ýralskaia nedelia" portalyna silteme jasap.
Esterińizge sala ketsek, tarih pániniń muǵalimi Sherhan Baizenov tanymal mánerlep syrǵanaýshy Denis Tenniń óliminen keiin Instagram, Facebook jelilerine post jazyp, ony óltirgen "qytailyqtardy" maqtaǵan-dy. Qoǵamdyq rezonanstan keiin muǵalimniń ústinen qylmystyq is qozǵaldy.
Baizenov Denis Tenniń kim ekenin bilmeitinin aityp aqtalǵan. Qazirgi sátte ol mekteptegi jumysynan shettetildi.
Sot Sherhan Baizenovke kinásin moiyndaý arqyly kelisimge kelýge ruqsat bermedi. Eger ruqsat berse, bul onyń jazasyn jeńildetetin edi.
Sottalýshyǵa qarsy oqýshy kýálik etip, óziniń oǵan jelidegi jazbasy úshin eskertý jasaǵanyn aitty.
"Synyptastar tobyna Sherhan Baizenov jazbasynyń skrinshoty jiberildi. Men onyń mektepte ustaz bolyp jumys isteitinin bilemin. Maǵan unamaǵandyqtan, odan "Nege bulai jazdyńyz?" dep suradym. Jáne odan bul jazbany óshirýin ótindim. Al ol maǵan meniń kishkentai ekenimdi jáne kóp nárse túsinbeitinimdi aitty. Keiin synyptas qurbym ekeýimiz osy skrinshotty blogerler men basqa adamdarǵa jiberdik. Maǵan ustazdyń bulai jazǵany unamaidy", — dedi Danara Quldybaeva.
Sherhan Baizenov anasynyń aýyryp jatqanyn aityp, sottan ózin bas bostandyǵynan aiyrmaýdy surady. Sóz sońynda sottalýshy kóz jasyna erik berdi.
Sherhan Baizenovke qandai úkim kesiletini 24 qazan kúni belgili bolady.
Tanymal qazaqstandyq mánerlep syrǵanaýshy Denis Ten 19 shilde kúni Almatynyń ortalyǵynda urylardyń qolynan óldi. Sportshy olardyń kóliginiń ainasyn urlaǵaly jatqan jerden ústinen túsip, keiin sońdarynan júgiredi. Osy kezde urylardyń biri Denis Tendi pyshaqpen jaraqattaidy. Araǵa birneshe saǵat salyp Denis Ten kóp qan joǵaltqandyqtan, ota ústelinde kóz jumdy.
