Foto: QR TSM
Almatydaǵy Halyk Arena muz aidynynda 1–4 qazan aralyǵynda mánerlep syrǵanaýdan Denis Ten Memorial Challenge halyqaralyq týrniri ótip jatyr. Bul – biyl altynshy ret uiymdastyrylyp otyrǵan doda. Jarysty Qazaqstan mánerlep syrǵanaý odaǵy men Denis Ten qory birlesip ótkizýde, dep habarlaidy Ult.kz.
Týrnirdiń ashylý rásimine QR Týrizm jáne sport ministri Erbol Myrzabosynov qatysty. Ol óz sózinde Olimpiada júldegeri Denis Tenniń murasyn dáripteý jáne jas sportshylarǵa qoldaý kórsetý mańyzyn atap ótti.
Biylǵy jarysqa 18 elden sportshylar keldi. Olardyń qatarynda Qazaqstan, Kanada, Qytai, Italiia, Ońtústik Koreia, AQSh, Ispaniia jáne ózge elderdiń úzdik mánerlep syrǵanaýshylary bar. Qazaqstan namysyn 24 sportshy qorǵaidy. Arasynda Mihail Shaidorov, Sofiia Farafonova, Amira Irmatova, Veronika Kovalenko, Boisangýr Datiev, Veronika Kim, Sabina Botina, Dias Jirenbaev jáne Anna Sannikova bar.
Foto: QR TSM
Týrnirdi ataqty sport qairatkerleri de tamashalaýda. Arasynda áigili jattyqtyrýshylar Eteri Týtberidze, Tatiana Tarasova jáne Resei mánerlep syrǵanaý federatsiiasynyń bas hatshysy Aleksandr Kogan bar.
Kórermenderdi jasóspirimder men eresekter arasyndaǵy qysqa jáne erkin baǵdarlamalar, muzdaǵy yrǵaqty jáne erkin biler, sondai-aq marapattaý rásimderi men áserli gala-kontsert kútedi.
Denis Ten Memorial Challenge – 2019 jyldan beri dástúrli túrde ótkizilip kele jatqan týrnir. Ol 2014 jylǵy Olimpiadanyń qola júldegeri, qazaqstandyq mánerlep syrǵanaýshy Denis Tenniń qurmetine arnalǵan. 2021 jyldan bastap týrnir ISU Challenger Series kúntizbesine engizilgen.
