Almatyda ótip jatqan Denis Tenniń ólimi boiynsha sot barysynda sottalýshylar sot aldyndaǵy sońǵy sózderin aitty, dep habarlaidy QazAqparat tilshisi.
QR QK 188-babynyń 1-bólimi, 434-babymen aiyptalǵan Janar Tolybaeva jaryssóz barysynda kózine jas aldy.
«Men bul kisilerdiń qaiǵysyn túsinemin. Bul - búkil Qazaqstannyń qaiǵysy. Men taǵy keshirim suraimyn. Meniń ishimdegi, əri úidegi balamnyń kóz jasyn eskerseńizder. Ədiletti sheshim qabyldaýyńyzdy suraimyn», - dedi Janar Tolybaeva.
Óz kezeginde Nuraly Qiiasov eki aýyz ǵana sóz aitty.
«Bolǵan oqiǵaǵa ókinemin. Bizdi keshirý múmkin emes. Sonda da keshirim suraimyn. Meniń de ata-anam bar. Olar da meni jaqsy tərbieledi. Biraq men qatelikterimdi ózim túzeýim kerek. Biz Denisti óltiremiz degen oiymyz bolǵan joq. Ədil sheshim shyǵarýyńyzdy suraimyn»,- dedi Nuraly Qiiasov.
«Men keshirim suraimyn. Qatty ókinemin. Men bulai bolǵanyn qalamaǵan edim. Men anasynyń júregindegi qaiǵyny jaqsy túsinip turmyn. Ol kisi osyndai adamdy tərbieleý úshin baryn saldy. Biz Denis Tennen airylyp qalǵanymyzǵa ókinemin. Denis Qazaqstannyń jaýhary edi»,- dedi A.Qudaibergenov.
Aita ketý kerek, erteń keshki 17:00-de sot úkimi oqylatyn boldy.
Eske salsaq, Denis Tendi ótken jyldyń 19 shildesinde Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumdy.
Denis Tenniń ólimine qatysty qylmystyq is qozǵalyp, kúdiktiler izdestirildi. Elbasy Denis Tenge qatysty qylmysty muqiiat tekserýdi tapsyrdy. Keiin QR IIM kúdiktilerdiń ustalǵanyn jariia etti. Al, qyrkúiek aiynyń sońynda Ishki ister ministri Qalmuhanbet Qasymov atalmysh qylmystyq istiń tergelýine qatysty málimet bergen bolatyn. 25-jeltoqsanda Almaty qylmystyq ister boiynsha aýdanaralyq mamandandyrylǵan sotynda belgili sportshynyń ólimi boiynsha aldyn ala sot tyńdalymy ótti.
Sottyń sońǵy otyrysynda sottalýshy Nuraly Qiiasov óz kinəsin ishinara moiyndaǵan bolatyn.
