Almaty ákimi qyrshynynan qiylǵan sportshy Denis Tenniń rýhyna taǵzym retinde qalada qandai nysandar paida bolatynyn aitty, dep habarlaidy QazAqparat tilshisi.
Qala ákimi Almatyda mánerlep syrǵanaýdan Denis Ten atyndaǵy týrnir uiymdastyrylatynyn aitty.
«Denis Tenniń qazasy búkil qazaqstandyqtardy dúrliktirip qana qoimai, biriktirdi. Men Denistiń ata-anasymen eki ret áńgimelestim. Aldyńǵy kúni taǵy da júzdestim. Qala ákimdigi mánerlep syrǵanaýdan Denis Ten atyndaǵy týrnir uiymdastyratyn boldy. Halyqaralyq dodaǵa jas sportshylar qatysady. Almaty - qysqy sporttyń ortalyǵy. Sondyqtan, bul týrnir qalaǵa kerek», - dedi B.Baibek. Sonymen qatar, Denis Tenniń rýhyna arnap sportshy kóz jumǵan jerge eskertkish ornatylady.
«Biz eskertkishtiń eń ozyq úlgisin anyqtaý úshin músinshiler arasynda baiqaý jariialaimyz. Qazir osy baǵytta Denis Tenniń týystarynyń qatysýymen komissiia quryldy», - dedi ákim.
Sondai-aq, Denis Ten týǵan úige eskertkish taqta ornatylyp, kitap jazylady.
«Týysqandarynda Denis Ten týraly barlyq málimet bar. Ony kitap etip jazý úshin barynsha qarjylyq kómek kórsetemiz. Osy máselelerdiń barlyǵy meniń jeke baqylaýymda bolady», - dedi ákim.
Munyń aldynda Denis Tenniń anasy QR mádeniet jáne sport ministrligi mánerlep syrǵanaý akademiiasyn ashýdy josparlap otyrǵanyn aitqan bolatyn.
