Almaty oblystyq soty sottalýshy Janar Tolybaevaǵa qatysty «jazany neǵurlym jeńil túrine aýystyrý» týraly Ile aýdandyq sotynyń qaýlysyn buzdy, dep habarlaidy "Ult aqparat".
Eske sala ketsek, 2019 jyldyń 17 qańtardaǵy Almaty qalasynyń mamandandyrylǵan aýdanaralyq qylmystyq sotynyń úkimimen J.Tolybaeva «qylmystyq quqyq buzýshylyqty jasyrý» faktisimen kináli dep tanylyp, oǵan 4 jyl bas bostandyǵynan aiyrý jazasy taǵaiyndalǵan, jazany óteý merzimi 2018 jyldyń 21 shildesinen bastap eseptelgen.
2019 jyly jeltoqsan aiynda J.Tolybaeva jaza merziminiń – 1/3 bóligin ótep, óziniń konstitýtsiialyq quqyǵyn paidalana otyryp, «jazanyń ótelmegen bóligin jazanyń neǵurlym jeńil túrine aýystyrý» týraly aryzymen sotqa júgingen.
2020 jyldyń 6 qańtarynda Ile aýdandyq sotynyń qaýlysymen J.Tolybaevanyń aryzy qanaǵattandyrylyp, bas bostandyǵynan aiyrý jazasynyń ótelmegen merzimi bas bostandyǵynan shekteý jazasyna aýystyrylǵan.
Sotta, J.Tolybaevany mekeme ákimshiligimen jaǵymdy sipattalǵany jáne prokýrordyń sottalǵannyń ótinishin qoldap, jazasyn neǵurylym jeńil túrine aýystyrýdy suraǵany eskerilgen.
2021 jyly qańtar aiynda, jábirlenýshi tarap sot qaýlysymen kelispei, apelliatsiialyq shaǵym berý merzimin qalpyna keltirip, Almaty oblystyq sotyna sot qaýlysyn buzýdy surap jeke shaǵym keltirgen.
Almaty oblystyq sotynyń qylmystyq ister jónindegi sot alqasynyń 2021 jyl 19 naýryz qaýlysymen, Ile aýdandyq sotynyń 2020 jyl 6 qańtardaǵy qaýlysy buzylyp, jábirlenýshiniń jeke shaǵymy qanaǵattandyrylǵan.
Sot alqasy, sotqa usynylǵan materialda sottalǵannyń túzelý jolyna túskendigi týraly málimettiń jetkiliksiz ekenin, sonymen qatar, birinshi satydaǵy sottyń sheshim shyǵarý kezinde jábirlenýshi taraptyń pikiri eskerilmegendigin anyqtaǵan.
«Osy oraida J.Tolybaeva jazasyn ary qarai óteý úshin LA-155/4 túzetý mekemesine qaitaryldy»,- delingen Almaty oblystyq sotynyń baspasóz qyzmeti jariialaǵan habarlamada.
Aita ketsek, belgili sportshy, Olimpiada júldegeri Denis Tendi óltirgen Arman Qudaibergenov, Nuraly Qiiasov jáne Janar Tolybaevalar 2019 jyly qańtar aiynda sottalǵan bolatyn. Sýdia eki sottalýshyny 18 jylǵa bas bostandyǵynan aiyrý týraly, júkti áiel Tolybaevany 4 jylǵa bas bostandyǵynan aiyrý týraly úkim shyǵardy.
