Qapyda urylardyń qolynan qaza tapqan Olimpiada qola júldegeri Denis Tenniń anasy ulynyń ideialaryn júzege asyrýǵa qatysty josparlaryn jariia etti, dep habarlaidy QazAqparat tilshisi.
Qiyn kúnderi jan-jaqty qoldaý kórsetken barsha qazaqstandyqtarǵa Denistiń otbasy atynan rizashylyǵyn bildirgen Oksana Ten ulynyń atyn máńgige qaldyrýǵa qatysty kóptegen ideialar men usynystardyń bolǵanyn aitty.
«Biz memlekettik organdarmen birge mundai jumystardy bastap ketkenimizdi qoǵamǵa qulaǵdar etkim keledi. Denistiń josparlary men jobalaryn júzege asyrý úshin arnaiy qoǵamdyq qordy tirkeý júrip jatyr. Mádeniet jáne sport ministrliginiń, Almaty qalasy ákimdiginiń basshylyǵymen jeke kezdesý barysynda birqatar usynys jasaǵan edik. Olardyń barlyǵy da túsinistik taýyp, qoldaýǵa ie boldy. Qazaqstan Respýblikasynyń Mádeniet jáne sport ministrligi Denis Ten atyndaǵy Mánerlep syrǵanaý akademiiasyn ashýdy josparlap otyr. Al Almaty qalasynyń ákimdigi jyl saiyn Denisti eske alýǵa arnalǵan mánerlep syrǵanaýdan halyqaralyq týrnir ótkizýdi óz moinyna aldy», - dedi Oksana Ten.
Onyń atap ótýinshe, Almaty ákimdigi qaiǵyly oqiǵa oryn alǵan jerge Denistiń eskertkishin ornatý jobasyn júzege asyrýdy qolǵa almaq. Ol úshin arnaiy komissiia qurylyp, onyń quramyna Denistiń otbasynyń músheleri de kiretin bolady.Kkásibi músinshiler arasynda baiqaý jariialanady.
«Munan bólek, ákimdik Denis dúniege kelip, ómir súrgen úiimizge eskertkish taqtasyn ornatýǵa, Denis týraly kitap shyǵarýǵa kómektesýge ýáde berdi. Búginde Denistiń dostarymen birge kitapqa arnalǵan materialdardy daiyndap jatyrmyz. Taiaý ýaqytta Denis Ten qorynyń keńsesi ornalasqan mekenjaidy habarlaityn bolamyz. Bizdiń qasymyzdan tabylyp, jan-jaqty kómek kórsetkenderdiń barlyǵyna alǵysymyz sheksiz», - dedi Oksana Ten.
Sonymen qatar, ol Denistiń ideialary naqty ómirde júzege asaryna senimdi ekendigin basa atap ótedi.
