Foto: roddom.rklinik.kz
Shymkent turǵyny Nazerke Pirimbetova №2 qalalyq aýrýhanada bosanýǵa tiis bolǵan. Biraq aýrýhanada bir ai jatqan áieldiń sábii jatyrynda shetinep ketti. Balasynan aiyrylǵan ana qaiǵyly jaǵdai der kezinde kesar tiligin jasamaǵannan bolyp otyr deidi, dep habarlaidy Ult.kz Almaty.tv arnasyna silteme jasap.
Týystary meditsina qyzmetkerlerin nemqurailylyq tanytty dep aiyptap, isti muqiiat tergeýdi surap otyr.
“Ony 5–6 ret tekserdi, KT únemi nashar nátije kórsetetin. Túnde de mazasyz bolatyn. Munyń bárin biz dárigerlerge aittyq, biraq olar múlde qaramady. Sonyń saldarynan, mine, men balamnan aiyryldym”, – deidi zardap shekken áieldiń kúieýi Abai Berdibek.
Sábi shetinep ketken soń dárigerler naqty túsinikti jaýap bere almaǵan. Kerisinshe, “bala tolyq damymaǵan” dep aqtalýǵa tyrysqan. Budan bólek, meditsina qyzmetkerleri jábirlenýshiden jýrnalistermen sóilespeýin surap, tipti palatadan shyǵarmai qoiǵan.
“Men palataǵa kirgende, onda bas dárigerdiń mindetin atqarýshy, akýsherler, medbikeler jáne tipti tergeýshi jinalypty. Olar qaryndasyma sábidi máiithanaǵa bermeýge kóndirip jatqan. Óitkeni onda náresteniń denesin soiýǵa jiberedi dep sendirýge tyrysqan. Menińshe, olar máiitke saraptama jasatpai, isti jyly jaýyp qoimaq boldy”, – deidi jábirlenýshiniń aǵasy Asanáli Pirimbetov.
Qazir bul fakti boiynsha qylmystyq is qozǵaldy. Politsiia meditsina qyzmetkerleriniń áreketterin tekserip jatyr. Sábidiń denesi, platsenta jáne kindik baýy saraptamaǵa jiberildi. Ol balanyń naqty neden shetinep ketkenin anyqtaýǵa tiis. Sonymen qatar qalalyq Densaýlyq saqtaý basqarmasy kesar tiligin jasaý josparlanǵanyn málimdedi.
“Uryqtyń ókpesin daiyndaý úshin kesar tiligin osy aptada jasaý kerek edi. Alaida platsentanyń ózinde jáne onyń tamyrlarynda problemalar boldy. Sonyń saldarynan platsenta men onyń tamyrlaryndaǵy máselelerden keiin uryqty qorektendirý men ottegimen qamtamasyz etý nasharlap, aǵza óziniń tepe-teńdigin saqtai almai, dekompensatsiia bolǵan. Osylaisha, 3-inen 4 jeltoqsanǵa qaraǵan túni uryqtyń antenataldyq ólimi tirkeldi”, – dedi Densaýlyq saqtaý basqarmasynyń bólim basshysy Inna Glazebnaia.
Aýrýhanada bolǵan qaiǵyly jaǵdaidan keiin baqylaý kúsheitildi. Meditsinalyq jáne farmatsevtikalyq baqylaý komiteti oqiǵanyń barlyq deregin anyqtaý úshin tekserý júrgizip jatyr.
