Jetisý oblysynyń Sarqan aýdanynda qoqystan basy men denesi bólek tabylǵan 5 jastaǵy qyzdyń anasy men naǵashy aǵasy sot aldynda jaýap berdi. Olar búldirshindi óltirmegenderin, bala syrqatynan qaitys bolǵanyn málimdedi. Al jasamaǵan qylmystaryn politseilerdiń qysymynan keiin moiyndaǵanyn aitady. Bul týraly Informbiýro baǵdarlamasynda habarlandy, dep jazady halyq-uni.kz portaly.
Bes jastaǵy Arýjandy «óltirdi» degen kúdikpen onyń 20 jastaǵy anasy Aqniet pen týǵan naǵashy aǵasy Aqtilek ustalǵan. Ekeýine «adam óltirý» baby boiynsha aiyp taǵylǵan. Sot-meditsinalyq saraptamada balanyń qylqyndyrǵan soń ólgeni kórsetilgen. Biraq anasy muny moiyndamady. Aitýynsha, Arýjandy óziniń naǵashy aǵasynan bosanǵandyqtan, bala aýrýshań bolǵan. Ári sol syrqatynan kóz jumǵan.
«Naǵashy aǵam zorlaǵan, odan keiin sal bala týdy, 14 jasymda bosandym. Bastapqyda balanyń shetinegenin, barlyǵyn aitqanbyz. Biraq ekinshi jaýap bizden advokatsyz uryp-soǵyp alynǵan. Solai aittyq, qysymmen «iá, balany óltirdik» dedik», – dedi anasy Aqniet.
Aqtilektiń aitýynsha, «qoryqqandyqtan» balany arýlap jer qoinyna tapsyrmai, máiitin qoqysqa laqtyrǵan.
Isti bolǵan anasy men aǵasy balanyń ólimi jaily ne politsiiaǵa, ne balanyń múgedektigine zeinetaqy tólep otyrǵan mekemege de habarlamaǵan. Al marqum Arýjan 3 jasyna deiin bóbekter úiinde, keiin anasynyń týysy bolyp keletin Baqytgúl Óskenbaevanyń qolynda bolypty. Onyń aitýynsha, Arýjan aýyrmaǵan, bul jaǵdai balany anasy alyp ketken soń bolǵan.
«1 jastan 3 jasqa deiin bóbekterdiń, múgedekterge arnalǵan úide tárbielendi. Sodan keiin tórt jasynan bastap 9 ai men qaradym. Sol kúni kelinim men ulym kelip alyp ketti. Sol kúni keshke jaqyn Taldyqorǵannan baýyryn shaqyryp, aparyp óltirip tastaǵan», – dep málimdedi Sarqan aýdanynyń turǵyny Baqytgúl Óskenbaeva.
Jantúrshigerlik qylmys osydan bes ai buryn Sarqanda bolǵan. Bes jasar qyz balanyń denesi bir bólek, basy bir bólek kúiinde qaladaǵy qoqystan tabyldy. Saraptama nátijesinde máiittiń qoqysta úsh ai jatqany anyqtaldy. Al osy qylmysqa qatysty sottalyp jatqan anasy qazir úshinshi balasyna aiaǵy aýyr. Eger sottalýshylardyń kinási dáleldense, 20 jylǵa nemese ómir boiyna bas bostandyǵynan aiyrylýy múmkin.
