Informburo.kz saitynyń bas redaktory Mihail Dorofeev jýrnalisterdiń beibit jiyndarda qyzmet etý qaǵidalary jaily pikir bildirdi, dep habarlaidy QazAqparat.
«Bul qujattyń mańyzy zor. Sebebi eń aldymen bul qaǵidalar memlekettik organdardyń, onyń ishinde Aqparat jáne qoǵamdyq damý ministrliginiń ózgeriske degen daiyndyǵyn kórsetip, ministrliktiń BAQ qyzmetin shekteý úshin qyzmet etpeitinin dáleldei túsedi. Zańda biz kórip otyrǵan erejeler bul tendentsiiany rastai túsedi. Redaktsiialyq turǵyda álbette pikirtalas bar. Áitse de qaǵidalar jalpy demokratiialyq jáne liberaldyq sipatqa ie», - dedi ol Aqparat jáne qoǵamdyq damý ministri Aida Balaevanyń qatysýymen ótken onlain kezdesýde.
Onyń aitýyna qaraǵanda, jýrnalisterdiń beibit jiyndarǵa qatysýy turǵysynda óte mańyzdy másele bar.
«Erejelerdiń ataýyn ózgertpeý kerektigin túsinemiz. Bári zańda jazylǵan. Áitse de, jýrnalist reportaj jasaityn maman retinde de, beibit jiyndaǵy uransózdermen kelisip, qatysatyn qatysýshy retinde de bola alady. Sol sebepti óz mindetin atqaratyn maman men mitingke qatysatyn jeke tulǵany ajyratyp alýymyz kerek. Sol sebepti erejelerdi ózgertý usynysy dál osy máselege tireledi», - dedi ol.
Mihail Dorofeev beibit jiynda kásibi mindettemesin oryndaityn adamnyń óz quqyǵy men mindettemesi baryn aitady. Al mitingke qatysatyn adamnyń óz ideiasyna sai mindeti bar.
«Jýrnalist baspasóz ortalyǵynda da, odan tys ta jumys istei alatyny qaǵidalardy naqty jazylýy tiis. Sebebi kúsh qurylymdary da osy qaǵidattardyń erejelerin paidalanady. Kúsh qurylymdary jýrnalistiń qandai quqyǵy bary nemese joǵyn bilip turýy tiis», - dedi ol.
