QR Parlamenti Senatynyń jalpy otyrysynda depýtat Lázzat Súleimen Strategiialyq josparlaý jáne reformalaý agenttiginiń tóraǵasy Qairat Kelimbetovke depýtattyq saýal joldady, dep habarlaidy "Ult aqparat".
Onda senator ulttyq deńgeide de, óńirlik deńgeide de adami kapitaldyń sany men sapasyn baǵalaýdyń zamanaýi memlekettik basqarýdaǵy orny erekshe ekenine toqtala kelip, demografiialyq faktorlar memlekettiń ekonomikalyq jáne áleýmettik damýynyń negizgi quramdas bóligi ekenin atap ótti.
«Sońǵy onjyldyqta Qazaqstan halqynyń sany 2 million 400 myń adamǵa nemese 15,1 paiyzǵa ósti, negizinen onyń tabiǵi ósimimen qamtamasyz etildi», - dedi senator L.Súleimen óziniń saýalynda.
Onyń paiymynsha, demografiialyq ózgeristerdiń teris saldaryn eńserýdi aldyn ala strategiialyq josparlaý jáne bul maqsatqa qol jetkizip demografiialyq dividend alý úshin, memleket adam kapitalyna investitsiialardyń deńgeii men qaitarymyn arttyrýǵa baǵyttalǵan saiasat júrgizýi tiis. Ol úshin jastardyń eńbek naryǵyna tartylýyn ulǵaitý, jastardyń densaýlyq, eńbek jáne reprodýktivti quqyqtary, áleýmettik qoldaý kepildikterin qamtamasyz etýge baǵyttalǵan, bala týýdy qoldaý saiasaty naqty ári nátijeli bolýy tiis.
Senator bul qadamdar halyqtyń sany men bólinýin, onyń aǵymdaǵy jáne boljamdy jas qurylymy men ósý qarqynyn túsiný qajet ekenine toqtaldy. Sondyqtan ishki kóshi-qon aǵyndaryn retteý jónindegi mindet, demografiialyq damý, halyqtyń dinamikasyn boljaý jáne onyń ornyqty damýymen, reprodýktivti densaýlyǵymen ári quqyqtarymen, genderlik teńdikti kúsheitýmen, otbasy men halyqtyń álsiz toptaryn qoldaýmen bailanysty máselelerdi biryńǵai memlekettik demografiialyq saiasat etip júieleý qajettigin atap ótti.
Sonymen qatar elimizdiń demografiialyq damýy (demografiialyq qaýipsizdik) saiasatynyń 2020-2030 jyldarǵa arnalǵan baǵdarlamasyn/tujyrymdamasyn ázirleý qajet ekenin aitty.
