Eńbek jáne halyqty áleýmettik qorǵaý ministri Berdibek Saparbaev demeýshilerdiń esebinen turmysy tómen otbasylarǵa baspana berý josparymen bólisti, dep habarlaidy Sputnik Qazaqstan.
"Búginde iri kompaniialar men biznesmenderdiń esebinen baspana satyp alý sharalary qolǵa alyndy. Máselen, jaqynda Bolat Ótemuratovtyń qory 100 páter satyp aldy. Kásipker Nurlan Smaǵulov 11 páter satyp alyp berdi. Buǵan deiin Qazaqmys 48 páter aldy", - dedi Saparbaev úkimet úiinde ótken baspasóz máslihatynda.
Ministrdiń aitýynsha, biyl úsh aidyń ishinde demeýshilerdiń esebinen 385 páter satyp alyndy.
"Búginde biz úlken bir maqsat qoiyp otyrmyz. Jyldyń aiaǵyna deiin osy sanattaǵy páterlerdiń sanyn, kem degende, 1 700-ge deiin jetkizýdi kózdeimiz", - dep atap kórsetti Saparbaev.
Aita keteiik, búgingi baspasóz máslihatynda indýstriia jáne infraqurylymdyq damý ministri Roman Skliar jeńildetilgen baspana kreditteri týraly aitty. Onyń sózine súiensek, shilde aiynan bastap jeńildetilgen ipotekalyq kreditterdi berý bastalady: jyldyq mólsherlemesi - 2 protsent, alǵashqy jarnasy - 20 protsent, merzimi - 20 jyl.
Skliardyń aitýynsha, jeńildetilgen ipoteka kópbalaly otbasylarǵa, tolyq emes otbasylarǵa jáne múgedek balasy bar otbasylarǵa beriletin bolady. Al otbasynyń tólem qabilettin teksergende, memlekettik járdemaqylar esepke alynbaidy. Iaǵni, járdemaqy ǵana alyp otyrǵan otbasylarǵa jeńildetilgen ipoteka berilmeidi.
