Qazaqstannyń depozitterge kepildik berý qory (QDKBQ, Qor) «Delta Bank» AQ salymshylaryna kepildik berilgen ótemdi tóleýdi sońǵy kúnin qosa sanaǵanda 2022 jyldyń 1 mamyryna deiin uzartý týraly «Bank TsentrKredit» AQ-pen kelisimge qol qoidy, dep habarlaidy "Ult aqparat".
Kórsetilgen merzim ishinde «Delta Bank» AQ salymshylary agent banktiń jergilikti bólimshelerine júginip, kepildik berilgen ótemdi tóleý jónindegi ótinishti tikelei nemese senim bildirilgen tulǵa arqyly bere alady. Jeke ózi kelgen jaǵdaida salymshynyń jeke basyn kýálandyratyn qujaty bolsa jetkilikti, al eger senim artylǵan tulǵa keletin bolsa, salymshynyń atynan ótem alý quqyǵyn rastaityn quqyq belgileýshi qujattardy usynady (mysaly, notariýs kýálandyrǵan senimhat).
«Delta Bank» AQ salymshylaryna kepildik berilgen ótem agent bank arqyly 2018 jyldyń 17 mamyrynan beri tólenip keledi. Úsh jyl ishinde jalpy somasy 107,3 mln teńgege ótem tólendi. Bul qor mindettemeleriniń jalpy somasynyń 53 paiyzyn quraidy.
«2021 jyldyń 1 mamyryna qarai kepildik berilgen ótemdi alý úshin 328 salymshy ǵana ótinish bergen. Bul olardyń jalpy sanynyń 12 paiyzyn quraidy. Agent bankke kelýshiler sanynyń az bolýy «Delta Bank» AQ-ta ashylǵan shottar men depozitterdegi qaldyq aqshalardyń azdyǵyna bailanysty bolyp otyr. Naqty aitar bolsaq, 963 salymshynyń árbiriniń shotyndaǵy qaldyq aqsha 1000 teńgeden tómen, sondai-aq 412 salymshynyń shottarynda – 1 000 teńgeden 5 000 teńgege deiin bolsa, 158 salymshyda - 5 000 teńgeden 10 000 teńgege deiin bar»,-delingen habarlamada.
Degenmen «Delta Bank» AQ-taǵy shottarynda 100 000 jáne 1 000 000 teńgeden astam qarajat jinaǵan salymshylardyń da bar ekenin aita ketken jón. Sondyqtan Qor osy jáne kepildik berilgen ótemdi alýǵa quqyǵy bar basqa da salymshylar úshin agent bank arqyly tólem alý merzimin sońǵy kúnin qosa sanaǵanda 2022 jyldyń 1 mamyryna deiin uzartty.
2022 jyldyń 1 mamyrynan keiin «Delta Bank» AQ salymshylary burynǵydai Qorǵa ótem alýǵa tikelei ótinish bere almaidy. Qor talap etilmegen kepildik berilgen ótemdi Qazaqstan Respýblikasynyń zeinetaqymen qamsyzdandyrý zańnamasyna sáikes depozitordyń atyna Biryńǵai jinaqtaýshy zeinetaqy qorynda ashylǵan, erikti zeinetaqy jarnalaryn esepke alýǵa arnalǵan jeke zeinetaqy shotyna aýdarady.
