© Sputnik / Mihail Mordasov
Qazaqstanda jalpyǵa birdei deklaratsiialaýdyń úshinshi kezeńi aiaqtaldy, dep habarlaidy memlekettik kirister komiteti.
Osy bastama sheńberinde biznes ókilderi — zańdy tulǵalardyń basshylary, quryltaishylary men qatysýshylary, sondai-aq dara kásipkerler jáne olardyń jubailary 250.00 nysany boiynsha deklaratsiiany tapsyra otyryp, Qazaqstandaǵy jáne sheteldegi óz aktivterin deklaratsiialady.
Budan basqa, buryn jalpyǵa birdei deklaratsiialaý júiesine kirgen azamattar 270.00 nysandy kirister men múlik týraly jyl saiynǵy deklaratsiiasyn usyndy.
“Deklaratsiialardy tapsyrý merzimi biyl 1 qańtardan 16 qyrkúiekke deiin belgilendi. Aqparattyq qoldaýǵa qaramastan, keibir salyq tóleýshiler belgilengen merzimde deklaratsiia tapsyrǵan joq. Mundai jaǵdailarda salyq organdary buzýshylyqtardy joiý úshin qosymsha 30 jumys kúnin bere otyryp, salyq zańnamasynda belgilengen merzimde jeke tulǵalarǵa salyq eseptiligin usynbaý týraly habarlama jiberedi. Osylaisha, azamattarǵa deklaratsiia tapsyrý úshin 10 ai ýaqyt berildi”, - delingen habarlamada.
Deklaratsiiany ýaqytyly tapsyra almaǵan azamattar úshin birinshi ret eskertý túrinde ákimshilik jaýapkershilik qarastyrylǵan. Buzýshylyqtar joiylǵannan keiin banktik shottar boiynsha shyǵys operatsiialary bir jumys kúninen keshiktirilmei buǵattan sheshiledi.
“Jalpyǵa birdei deklaratsiialaý boiynsha deklaratsiia tapsyrýǵa mindetti 4,8 million adamnyń ishinen deklaratsiiany usynbaǵany úshin memlekettik kiris organdary 68,3 myń nemese 1,4% dara kásipker men jeke praktikamen ainalysatyn tulǵalardyń banktik shottary boiynsha shyǵys operatsiialaryn toqtatty. Búginde deklaratsiiany merziminen keiin tapsyrǵan 17,5 myńnan astam salyq tóleýshiniń banktik shottaryndaǵy buǵatty sheshildi”, - deidi komitet.
