Foto: huggies.ru
Júktilik pen bosaný kezinde beriletin áleýmettik tólemderdi zańsyz taǵaiyndaǵandar anyqtaldy, dep habarlaidy Qarjylyq monitoring agenttigi.
Agenttik 2024–2025 jyldar aralyǵynda 1,2 mlrd teńge zalal keltirgen 13 sotqa deiingi tergeý júrgizdi.
"Júktilik jáne bosaný boiynsha járdemaqylardy zańsyz taǵaiyndaý derekteri boiynsha 10 is tergelip, olardyń zańsyz shemalardy uiymdastyrǵan 15 adam jaýapqa tartyldy", - delingen agenttik habarlamasynda.
Jalǵan jumyspen qamtý arqyly 385 júkti áielge shyndyqqa sai kelmeitin málimetter negizinde járdemaqy taǵaiyndalyp, bul memleketke 1 mlrd teńgeden astam shyǵyn keltirdi.
"Aqtóbe oblysynda Úmirbekova men Baimurzaeva 70 júkti áieldi 29 jeke kásipkerlikke jalǵan túrde jumysqa ornalastyryp, 487 mln teńge biýdjet qarjysyn jymqyrǵany úshin 6 jylǵa bas bostandyǵynan aiyryldy", - deidi agenttiktegiler.
Shymkent qalasynda Dúisenova osyǵan uqsas qylmys jasap, memleketke 98 mln teńge zalal keltirgeni úshin 5 jylǵa sottaldy.
Anyqtalǵan barlyq iste qylmystyń jasalý tásili birdei bolǵan.
"Qaskúnemder júkti áielderdi arnaiy qurylǵan jeke kásipkerlikterge jalǵan jumysqa ornalastyryp, ótken kúnmen eń joǵary áleýmettik jáne zeinetaqy aýdarymdaryn rásimdegen", - dep atap ótti qarjy monitoring agenttigi.
Ataýly áleýmettik kómekke bólingen biýdjet qarajatyn urlaý faktileri boiynsha da 15 jumyspen qamtý jáne áleýmettik baǵdarlamalar bólimderiniń laýazymdy tulǵalaryna qatysty 3 sotqa deiingi tergeý bastaldy.
Urlaý shemasy bas býhgalterdiń senimdi tulǵalardy áleýmettik kómek alýshylar tizimine engizýinen turǵan. Bul adamdar áleýmettik osal topqa jatpaǵan.
Osy derekter negizinde tólem tapsyrmalary rásimdelip, basshylyqpen bekitilgennen keiin qarajat jalǵan tulǵalardyń shottaryna aýdarylyp, qolma-qol aqshaǵa ainaldyrylyp, sybailastar arasynda bólingen.
