Ózbekstanda jaǵa ustatarlyq jaǵdai boldy. Tashkent pedagogika institýynda dekan orynbasary stýdent qyzdy zorlamaq bolyp, ekinshi qabattaǵy kabinettiń terezesinen iterip jibergen, dep habarlaidy Sputnik Qazaqstan portaly Sputnik Ózbekstan-ǵa silteme jasap.
Tergeý barysynda anyqtalǵandai, 3-kýrs stýdenti baiqaýǵa minezdeme alý úshin dekan orynbasarynyń kabinetine kirgen. Biraq er adam esikti ishten jaýyp, qyzdy zorlamaq bolady. Osy sátte qyz ashyq turǵan terezege júgirip, kómek suraidy. Alaida dekan orynbasary ony terezeden iterip jibergen.
Aýyr jaraqat alǵan stýdent shuǵyl aýrýhanaǵa jetkizildi, oǵan birneshe ota jasaldy.
Dekan orynbasary qyz terezeni jýyp júrgende ózi qulap tústi dep aqtalǵan. Alaida tergeýshiler onyń bul jaýabyna sengen joq. Kúdikti ustaldy. Ózbekstan Qylmystyq kodeksiniń "Zorlaý" jáne "Densaýlyqqa qasaqana ortasha dárejede ziian keltirý" baptary boiynsha qylmystyq is qozǵaldy, dep habarlady eldiń ishki ister bas basqarmasy.
Densaýlyq saqtaý ministrliginiń aqparatynsha, stýdent jabyq bas súiek-mi jaraqatyn aldy, súiegi synyp, miy shaiqalǵan, mańdaiy jarylǵan.
Qazir qyzdyń jaǵdaiy qanaǵattanarlyq, dárigerlerdiń baqylaýynda.
