Dúniejúzilik densaýlyq saqtaý uiymynyń basshysy Tedros Gebreiesýs COVID-19 pandemiiasyna bailanysty engizilgen shekteýlerdi alyp tastaý máselesine óte saq qaraýǵa shaqyrdy. Birqatar elderde koronavirýstyń taralýy báseńdei tústi. Osy oraida, bilik ókilderi «áleýmettik qashyqtyqty» saqtaýǵa baǵyttalǵan sharalardy toqtatý týraly oilana bastady, dep habarlaidy QazAqparat BUU Jańalyqtar ortalyǵyna silteme jasap.
Brifingte DDU basshysy COVID-19 – koronavirýstyń eń jańa tipi ekenin, jáne meditsinalyq qaýymdastyq ta, densaýlyq saqtaý qyzmetkerleri de ol týraly onymen kúres júrgizý barysynda tanysyp otyrǵanyn atap ótti. Al indetpen kúres strategiiasy óz kezeginde eń sońǵy málimetterge negizdeledi. Virýstyń qalai qozǵalatynyn, ony qalai toqtatý jáne odan qalai qorǵaný kerektigin túrli elderdiń tájiribesi kórsetýde.
«Biz COVID-19 óte tez taraitynyn jáne ólimge aparatynyn bilip otyrmyz: ol 2009 jylǵy gripp epidemiiasyna qaraǵanda 10 ese kóp adamdy óltirdi. Virýs adamdar kóp jinalatyn jerlerde, mysaly, qarttar úiinde tez taralatynyn bilemiz. Virýstyń taralýyn ustap qalý úshin árbir oqiǵany der kezinde anyqtap, test jasap, indet juqtyrǵan ár adamdy ýaqytyly oqshaýlaý jáne emdeý kerektigin bilemiz. Keibir elderde aýrý juqtyrǵan adamdardyń sany árbir 3-4 kún saiyn eki eselenip jatqanyn bilip otyrmyz», - dedi Tedros Gebreiesýs.
Onyń aitýynsha, qatań sharalardy kezeń-kezeńmen báseńdetý qajet. «Bul qadamǵa turaqty qatań baqylaý jasai otyryp jáne densaýlyq saqtaý júiesi infektsiiany juqtyrýdyń jańa jaǵdailaryn ýaqytyly anyqtap, emdei alatyn jaǵdaida, sondai-aq onyń qaitalaný jaǵdailaryna daiyn bolǵan kezde ǵana barý qajet», - dedi ol.
Bul rette keibir elder shekteýlerdi jumsartý múmkindigin qarastyrsa, basqalary olardy engizý týraly oilanýda. Bul Latyn Amerikasy, Afrika jáne Aziiadaǵy tabysy ortasha ján tómen elder.
«Men adamdar arasyndaǵy qashyqtyqty shekteý – aldyn alý úshin qajetti sharalar kesheniniń biri ǵana ekenin kóp ret aittym. Árbir úkimet jaǵdaidy baǵalap, óz azamattaryn qorǵai alý kerek», - dedi DDU basshysy.
Doktor Tedros DDU COVID-19 indetine bailanysty shekteýlerdi alyp tastaýǵa negiz bolatyn alty jaǵdai jazylǵan jańartylǵan strategiiany jariialaitynyn aitty.
