Dúniejúzilik densaýlyq saqtaý uiymy (DDSU) insýlin óndirisin ártaraptandyrýdyń pilottyq jobasy týraly jariialady. Jýyq arada baǵasy arzandaý insýlin paida bolýy múmkin, dep habarlaidy BUU Jańalyqtar saity.
DDSU Dúniejúzilik diabetke qarsy kúres kúniniń qarsańynda osyndai málimdeme jasap otyr. Ataýly kún 1922 jyly Charlz Bestpen birge diabetke qarsy insýlinniń oilap tabylýynda sheshýshi ról atqarǵan Frederik Bantingtiń týǵan kúnine orai, jyl saiyn 14 qarashada toilanady.
Diabet - qandaǵy qant mólsheriniń artýynan týyndaityn, ýaqyt óte kele kúsheietin sozylmaly aýrý. 1980 jyldan beri diabetpen aýyratyn adamdardyń sany 4 esege deiin artqan. Búgingi tańda álemde 420 mln adam diabetten zardap shegedi.
Birinshi tiptegi diabetpen aýyratyn adamdar insýlinsiz ómir súre almaidy. Al diabettiń ekinshi tipi paida bolǵan adamdar úshin insýlin qant mólsherin baqylaý jáne aýrýdyń kúsheiýiniń aldyn alý úshin qajet. Qazirgi tańda diabettiń ekinshi tipinen zardap shegetin 65 mln adam insýlinge muqtaj. Sonymen qatar kópshilik úshin onyń baǵasy qoljetimsiz.
Búginde álem boiynsha insýlin naryǵynyń basym bóligin úsh óndirýshi qolynda ustap otyr. 13 qarashada Jenevada ótken brifingte DDSU ókilderi basqa farmatsevtika kompaniialary da insýlin shyǵarýǵa ázir ekenin jetkizdi. Tipti olardyń keibiri Uiymǵa ózderi shyǵarǵan insýlinniń úlgisin de jiberip úlgergen.
«DDSU-nyń insýlin óndirisin ártaraptandyrý bastamasy — muqtaj jandardyń ómiri úshin asa qajet preparatty qoljetimdi etýge qoiylǵan asa mańyzdy qadam», — deidi DDSU bas direktory Tedros Gebreiesýs.
DDSU ókilderi osy sharanyń naryqtyń barlyq qatysýshylary úshin teńdei jaǵdai jasaitynyna úmit artyp otyr.
