Qiraǵan perzenthana mańynda turǵan áiel. Mariýpol, 9 naýryz 2022 jyl.
Ýkrainada soǵys bastalǵaly beri densaýlyq saqtaý mekemelerine keminde 43 ret shabýyl jasaldy, 12 adam qaza boldy. Dúniejúzilik densaýlyq saqtaý uiymynyń (DDSU) basshysy Tedros Gebreiesýs BUU-nyń Qaýipsizdik keńesinde osylai dep málimdedi. Bul týraly Azattyq radiosy habarlaidy.
Reseidiń Ýkrainadaǵy áskeri agerssiiasyna arnalǵan Qaýipsizdik keńesiniń otyrysy beisenbi kúni Niý-Iorkta ótti.
"Qandai jaǵdai bolmasyn, densaýlyq saqtaý mekemelerine shabýyldaý – halyqaralyq gýmanitarlyq quqyqty buzý bolyp esepteledi" dedi DDSU basshysy.
Ol qazir orys áskeriniń qorshaýynda qalǵan Sýmy jáne Mariýpol qalalaryna gýmanitarlyq kómek jetkizýde qiyndyqtar týyndap jatqanyn aitty.
Qaýipsizdik keńesiniń otyrysynda Batys elderi Reseidiń áreketin synǵa alyp, Máskeýdi tez arada soǵysty toqtatýǵa shaqyrdy.
Beisenbi kúni AQSh memlekettik hatshysy Entoni Blinken men Eýropa Odaǵynyń syrtqy saiasat mekemesiniń basshysy Djozep Borrel Reseidi Ýkrainada áskeri qylmys jasap jatyr dep aiyptady.
Blinken Resei prezidenti Vladimir Pýtindi "áskeri qylmysker" dep ataǵan AQSh lideri Djo Baidenniń aitqandarymen tolyq kelisetinin jetkizdi.
Memlekettik hatshy sózinde Mariýpoldaǵy adamdar jasyrynyp otyrǵan drama teatrǵa jasalǵan soqqyny jáne Chernigov qalasynda 10 beibit turǵynnyń qaza bolǵanyn eske saldy. Blinkenniń sózine qaraǵanda, soǵystyń úsh aptasynda Resei áskeriniń azamattyq nysandarǵa soqqy berip jatqany aiqyndalǵan. Degenmen Máskeý muny joqqa shyǵaryp keledi. AQSh-ta áskeri qylmys jasalǵanyn dáleldeitin aiǵaqtar jinalyp jatyr.
