Dúniejúzilik densaýlyq saqtaý uiymy Qazaqstan ǵalymdary ázirlegen koronavirýsqa qarsy QazCovid-in (QazVac) vaktsinasyn qashan tirkeýi múmkin? Bul saýalǵa Biologiialyq qaýipsizdik máseleleri jónindegi ǵylym-zertteý institýtynyń bas direktory Kúnsulý Zakariia jaýap berdi, dep habarlaidy QazAqparat tilshisi.
«Dúniejúzilik densaýlyq saqtaý uiymyna ótinim berip qoidyq. Protsedýra kúrdeli ári uzaqqa sozylady, qujattardy daiyn bolýyna qarai usynamyz. Búginde bul máselege orai elimizdiń Syrtqy ister ministrligi úlken kómek kórsetip jatyr. Sonymen qatar Densaýlyq saqtaý ministrliginen de keńes alyp otyrmyz», - dedi dedi ol QazAqparat tilshisine telefon arqyly bergen suhbatynda.
Onyń atap ótýinshe, Qazaqstandaǵy AQSh Elshiligi qazaqstandyq tarapqa konsýltantynyń qyzmetin usynǵan.
«Ol bizge vaktsinamyzdy tirkeý máselesi boiynsha keńes beredi. Iaǵni, bul máselede birneshe tarap, atap aitqanda Syrtqy ister ministrligi, Densaýlyq saqtaý ministrligi, Qazaqstandaǵy AQSh Elshiligi jáne bizdiń institýt tyǵyz jumys istep jatyr», - dedi institýt basshysy.
Sonymen qatar ol Qazaqstan vaktsinasyn tirkeý protsedýrasy qansha ýaqytqa sozylýy múmkin ekendigin de aitty.
«Tirkeý máselesinde ýaqyt shekteýi joq. Munyń barlyǵy qujattarymyzdyń sapasyna bailanysty. Eger olardyń kóńilinen shyqsa, talaptary men normalaryna sai kelse, onda másele tezirek sheshiledi», - dedi Kúnsula Zakariia.
