Pandemiia Eýropadaǵy qurylymdyq genderlik teńsizdikti kúsheitti. Bul týraly Dúniejúzilik densaýlyq saqtaý uiymynyń (DDSU) Eýropalyq aimaqtyq biýrosynyń direktory Hans Kliýge beisenbi kúni Facebook-te jariialanǵan Kopengagende ótken brifingte málimdedi, dep habarlaidy "Ult aqparat".
«Pandemiia bastalǵan kezde bul aimaqta birde-bir el genderlik teńdikke qol jetkize almady. Birde-bir. Kóbinese áielder qaýymy balalardy úide karantinde oqytýǵa jaýap beredi. Balaǵa aqy tólenbeitin kútim birinshi kezekte áielderdiń mindetine ainalady, bul olardyń aqy tólenetin jumysty oryndaý múmkindikterin shekteidi», - dedi ol.
Onyń aitýynsha, áielder áli kúnge deiin ulttyq nemese jahandyq deńgeide pandemiiaǵa qarsy sharalar týraly sheshim qabyldaý protsesine qatyspaidy. Bul rette álemniń meditsinalyq mekemelerindegi 10 densaýlyq saqtaý qyzmetkeriniń 7-den astamy - áielder, al Eýropa óńirinde medbikelerdiń 84% - y jáne dárigerlerdiń 53% -y.
Aimaqtyq biýronyń direktory COVID-19 jahandyq jaǵdailarynyń 8% -y densaýlyq saqtaý salasynyń qyzmetkerlerine tiisti ekendigin jáne olardyń juqtyrý qaýpi patsientterdiń kópshiligine qaraǵanda úsh ese kóp ekenin túsindirdi. Bes apta buryn koronavirýs juqtyrǵan 1,3 million meditsina qyzmetkeriniń 68% - y áielder boldy.
