DDSU basshysy Tedros Adhanom Gebreiesýs Almatyǵa keldi, - dep habarlaidy "Ult aqparat" Tengrinews.kz agenttigine silteme jasap.
Ol Qazaqstanǵa beiresmi saparmen kelgen. Qazaqstanda onyń qudalary turatyny belgili.
Tedros Adhanom Gebreiesýs elimizdiń jetekshi meditsinalyq ýniversiteti - Asfendiiarov atyndaǵy Qazaq ulttyq meditsina ýniversitetine (QazUMÝ) barǵan.
Asfendiiarov atyndaǵy QazUMÝ baspasóz qyzmeti málimetinshe, meditsinalyq ýniversitette DDSU basshysyn Densaýlyq saqtaý ministri Ajar Ǵiniiat qarsy alǵan. Ol ýniversitettiń qurmetti qonaqtary kitabyna estelik jazba qaldyrdy. Sondai-aq, Tedros Gebreiesýs Akademik Sharmanov atyndaǵy Dańq zalynda qazaqstandyq ǵylym men meditsinanyń jetekshi qairatkerleri – QazUMÝ professorlarymen kezdesti, álemdegi epidemiologiialyq jaǵdaidyń damýy týraly suraqtarǵa jaýap berdi.
QazUMÝ rektory Marat Shoranov DDSU basshysyna Qazaqstannyń jetekshi meditsinalyq ýniversitetine kelgeni úshin alǵysyn bildirdi.
"Dúniejúzilik densaýlyq saqtaý uiymynyń bas direktory laýazymyna ekinshi merzimge sailanýyńyzben quttyqtaimyz. Pandemiianyń alǵashqy kúnderinen bastap DDSU múshe memleketterge qoldaý kórsetip keledi. Memleketimizdiń basshysy Qasym-Jomart Toqaev 2021 jyly sizben onlain kezdesýinde jáne DDSU assambleiasynda sóilegen sózinde pandemiia kezinde Qazaqstanǵa kórsetken kómegińizdi joǵary baǵalaitynyn aitqan. Ol kezde men densaýlyq saqtaý vitse-ministri bolyp jumys istedim, sizge jáne sizdiń ujymǵa alǵysymdy qabyl alyńyzdar", - dedi QazUMÝ rektory.
