Álemniń pandemiiamen kúresi "ujymdyq sátsizdikke" ushyrap, adamzatqa orny tolmaityn zardap ákeldi. Dúniejúzilik densaýlyq saqtaý uiymynyń ǵalamdyq daiyndyq jónindegi keńestiń (Global Preparedness Monitoring Board) jańa esebinde osylai dep jazylǵan.
14 qyrkúiekte jariialanǵan esepte densaýlyq saqtaý salasy sarapshylarynyń jyldar boiǵy eskertýine qaramastan álem elderiniń indetke daiyndyqqa az qarajat jumsaǵany jazylǵan. Baiandamaǵa sáikes, kóptegen el basshylary ǵylymi, úzdik tájiribeler men aiǵaqtarǵa súiene otyryp, erterek sheshim qabyldaý múmkindigin jiberip alǵan. Sonyń kesirinen qoǵamda "senimsizdik boilap, indetke tótep berý kúrdelengen".
Byltyr jyl sońynda Qytaida paida bolǵaly beri koronavirýstyń jańa túri keminde 29 million adamǵa juqqan, 925 myńnan astam adam qaitys bolǵan. Pandemiia ekonomikany kúiretip, áleýmettik salany kúizeltti. Baiandama avtorlarynyń esebinshe, álem covid-tiń kesirinen 11 trln dollar shyǵynǵa ushyraǵan.
Álem boiynsha virýs juqtyrǵandardyń jartysy - Amerikada. AQSh, Braziliia, Meksika álemde pandemiiadan kóbirek zardap shekken elderdiń biri. 13 qyrkúiekte DDSU virýs juqtyrǵandar sanynyń bir kúnde buryn-sońdy bolmaǵan joǵary kórsetkishke jetkenin habarlady: 24 saǵat ishinde álemde 307 930 adamnan koronavirýs infektsiiasy anyqtalǵan. Eýropada atap aitqanda, Ispaniia, Frantsiiada sońǵy aptalarda indettiń órshýi baiqalǵan.
Ortalyq Aziiada buǵan deiin Ózbekstan koronavirýs juqtyrǵandar sanynyń kóbeigenin habarlaǵan. 10 qyrkúiekte bir kúnde 749 adamnan virýs tabylǵan. Elde virýs juqtyrǵandardyń jalpy sany 48 myńnan asqan, 400 adam qaitys bolǵan. Koronavirýs baryn moiyndamai kele jatqan Túrkimenstanda osyǵan deiin aýrýhanalardyń tolyp ketkeni, respiratorlyq aýrýǵa shaldyqqandardyń kúrt ulǵaiǵany habarlanǵan.
Tájikstanda sońǵy aqparat boiynsha, 9 088 adamnan koronavirýs tabylǵan, 72 adam qaitys bolǵan. Qyrǵyzstanda virýs juqtyrǵandar 44 999 adamǵa jetken, 1 063 adam qaitys bolǵan. Qazaqstanda koronavirýsqa uqsas pnevmoniiaǵa shaldyqqandardy qosqanda virýs juqtyrǵandar 136 myńnan asqan, 2000-nan astam adam qaitys bolǵan. Qazaqstan, Ózbekstan, Tájikstanda keibir sarapshylar resmi bilik jariialaǵan koronavirýs statistikasyna kúmán keltiredi.
