Men ádildikti jaqtaimyn. Sondyqtan memlekettik bilim grantyn tyiym salynǵan zattardy paidalanǵan talapker emes, test tapsyrmalaryn tek óz bilimine senip oryndaǵan testilenýshi utyp alǵanyn qalaimyn. Soltústik Qazaqstan oblysy Ǵabit Músirepov aýdany Toqsan bi orta mektebiniń túlegi Dáýren Teńesov osylai deidi. Talapker Ulttyq biryńǵai testileýde 109 ball jinady, dep habarlaidy "Ult aqparat" Bilim jáne ǵylym ministrligine silteme jasap.
«Men ótken jylǵy túlekterden «UBT-da kóshirip jazý ábden múmkin jáne qalypty jaǵdai», «men shpargalka paidalandym», «tyiym salynǵan zattardy paidalandym, degenmen eshkim baiqamady» degen áńgimelerdi jii estitinmin. Ókinishke qarai, kóptegen túlek kóshirip jazý jáne tyiym salynǵan zattardy paidalanýǵa qatysty oń kózqarasta. Meniń oiymsha, testilenýshiler kóbine shpargalkany ózine senimsiz bolǵan soń paidalanady nemese materialdy tolyq meńgerýge tyryspaidy. Shyny kerek, UBT-ǵa daiyndalý úshin ýaqyt jetkilikti, sondai-aq Ulttyq testileý ortalyǵynyń saitynda baiqaý synaqtary qoljetimdi boldy. Testilenýshilerdiń barlyǵy derlik ereje buzýshylyqtyń saldarlary qandai bolatynyn jaqsy túsinedi. Dei turǵanmen, keibireýler bul áreketterin ári qarai jalǵastyryp jatyr», – deidi Dáýren Teńesov.
Dáýren testileýge kirgizý barysynda tyiym salynǵan zattar anyqtalǵan jaǵdaida nátijelerdi joiý jáne talapkerdi UBT tapsyrý múmkindiginen bir jylǵa aiyrý ádil sheshim dep sanaidy.
«Biyl kalkýliatordy qoldanýǵa ruqsat etildi, bul - talapker úshin óte jaqsy múmkindik. Test tapsyrýdy josparlap otyrǵan túlekterge aitarym: emtihanda shpargalka nemese qosymsha ádebietti paidalaný múmkin emes. Barlyq aýditoriiada beinekamera ornatylǵan jáne onlain-transliatsiia júrgiziledi. Nátijesinde testilenýshiler naqty ýaqyt rejiminde baqylanyp, beinejazba 25 tamyzǵa deiin taldanyp, zerdelenedi. Meniń oiymsha, talapkerler testileý barysynda jańa erejelerdi saqtap, talaptardy barynsha oryndaý qajet ekenin túsingen siiaqty», – deidi túlek.
Biyldan bastap UBT-ǵa kirgizý jáne emtihan kezinde testilenýshiden uialy bailanys quraldary, anyqtamalyq materialdar, «shpargalka» jáne basqa da aqparat almasý quraldary anyqtalǵan jaǵdaida talapkerdiń nátijesi joiylady, sondai-aq ol bir jyl boiy UBT-ny tapsyrý múmkindiginen aiyrylady.
«Adam balasy tek óz kúshine ǵana senýi kerek. Osyndaida Abai atamyzdyń ónegeli sózderi tilge oralady: «Ózińe sen, ózińdi alyp shyǵar, eńbegiń men aqylyń eki jaqtap». Sondyqtan eń aldymen ózimizge senimdi, adal bolýymyz kerek», - dep Dáýren Teńesov oiyn qorytyndylady.
