Premer-Ministr Baqytjan Saǵyntaevtyń tóraǵalyǵymen ótken Úkimet otyrysynda «Tsifrlyq Qazaqstan» memlekettik baǵdarlamasynyń jobasy qaraldy, dep habarlaidy "Ult aqparat".
Aqparat jáne kommýnikatsiialar ministri Dáýren Abaev «Tsifrlyq Qazaqstan» memlekettik baǵdarlamasy 2018–2022 jyldarǵa arnalǵanyn, jáne ol elimizdiń aldyńǵy qatarly salalaryn tehnologiialyq jańǵyrtýǵa qosymsha serpin beretinin, eńbek ónimdiliginiń uzaqmerzimdi ári aýqymdy damýyna jaǵdai jasaitynyn atap ótti.
Baǵdarlama ony iske asyrýdyń bes negizgi baǵytynan turady:
— «Ekonomika salalaryn tsifrlandyrý»;
— «Tsifrlyq memleketke kóshý»;
— «Tsifrlyq Jibek jolyn iske asyrý»;
— «Adam kapitalyn damytý»;
— «Innovatsiialyq ekojúie qurý».
Osy bes baǵyt boiynsha 17 bastama men 120 is-shara uiymdastyryldy. 12 maqsatty indikator usynylady.
«Baǵdarlama qosylǵan qundy qalyptastyrý jáne ekonomikadaǵy shyǵyndardy qysqartý turǵysynan aitarlyqtai áleýetke ie, bul 2025 jyldan bastap jylyna 4,5-5% deńgeiinde el JIÓ-niń ósý qarqynyn qamtamasyz etýge múmkindik beredi, shamamen 1,6-2,2%, iaǵni, úshten bir bóligi tek tsifrlandyrylýǵa jumsalady», — dedi ministr.
Aldyn ala esepteý boiynsha, 2025 jylǵa qarai ekonomikany tsifrlandyrýdyń tikelei áseri 1,7-2,2 trln teńgege qosymsha qundy qurýǵa múmkindik beredi, bul 2025 jylǵa qarai jeke investitsiialardy esepke alǵanda jalpy investitsiialar kólemine investitsiialardyń qaitarymyn 4,8-6,4 esege qamtamasyz etedi.
Otyrysta máseleni qaraý aiasynda «Zerde» UBH basqarma tóraǵasy Rýslan Eńsebaev, sarapshy Sergei Perapechka sóz sóiledi, sondai-aq, taqyrypqa qatysty Premer-Ministrdiń orynbasary Asqar Jumaǵaliev túsinikteme berip ótti.
Máseleni qaraý qorytyndysy boiynsha Úkimet «Tsifrlyq Qazaqstan» baǵdarlamasynyń usynylǵan jobasyn qoldady.
