Ortalyq kommýnikatsiialar qyzmetindegi baspasóz máslihatynda Qysqy Olimpiadaǵa Qazaqstan delegatsiiasymen qandai laýazymdy tulǵalar baratyny habarlandy, dep habarlaidy QazAqparat.
QR Mádeniet jáne sport vitse-ministri Serik Jarasbaev Olimpiadaǵa ministr Dáýren Abaev jáne ózi qatysatynyn aitty. Odan basqa delegatsiia quramynda – 34 sportshy, 20 bapker, 7 qyzmet kórsetýshi, 7 shtab qyzmetkeri jáne 10 dáriger bar.
Sonymen birge, tilshiler «Ulttyq Olimpiada komitetiniń prezidenti Timýr Qulybaev ashylý saltanatyna qatysa ma?» - degen suraq qoidy.
«Olimpiada komiteti basshysynyń qatysýy josparlanǵan. Bul mindetti. Onyń Olimpiadanyń ashylý rásimine qatysýy josparda bar. Olimpiada tek qana kezdesýler men jarystardan ǵana turmaidy. Kóptegen sessiialar men kezdesýler ótedi. Barlyq jumys Olimpiada oiyndary kezinde qatar ótedi», - dep jaýap berdi UOK Bas hatshysy Andrei Kriýkov.
UOK ókiliniń aitýynsha, qazaqstandyq delegatsiia quramynda shamamen 100-ge jýyq adam bolady.
«Qazir kovidtik shekteýlerge bailanysty úlken talaptar bar, sondyqtan koronavirýsqa shaldyqqandar Olimpiadaǵa jiberilmeidi. Delegatsiia sany áli de naqtylanady, shamamen 100-ge jýyq adam bolýy múmkin», - dedi Andrei Kriýkov.
