QR Aqparat jáne kommýnikatsiialar ministri Dáýren Abaev Memleket basshysy Nursultan Nazarbaevtyń Úkimet pen Parlamentke jumystaryn qazaq tilinde ótkizýge qatysty tapsyrmasyn túsindirip berdi, dep habarlaidy «QazAqparat».
Ministrdiń aitýynsha, Úkimette orys tilinde sóileýge eshkim tyiym salmaǵan. «Meniń túsinýimshe, Memleket basshysy Úkimet pen Parlamentte biz memlekettik tilge kóshetinimizdi aitqysy keldi. Meniń oiymsha, bul memlekettik tildi meńgerý salasyna qatysty suraq. Biz Úkimet pen Parlamentte qazaq tilinde sóileitindei jaǵdaiǵa kóshýimiz kerek. Biraq, «tek qana» degen sóz meniń bilýimshe aitylmaǵan. Demek, bul Qazaqstannyń árbir azamatynyń memlekettik tildi meńgerý deńgeiine bailanysty», - deidi ministr.
Dáýren Abaev óz sózinde eger Úkimet múshesi óz oiyn orys tilinde jetkizýge qulyqty bolsa, oryssha sóileýine bolatynyn atap ótti.
Sonymen qatar, ministr otyrystarǵa qatysatyn tilshilerge sinhrondy aýdarma ázirlengendigin, al onlain-kórilimdegi kórermender úshin mundai aýdarma qarastyrylmaǵanyn tilge tiek etti. Osyǵan bailanysty BAQ ókilderi «orys tiline aýdarma jumysy qarastyryla ma?» degen saýal qoidy.
«Meniń oiymsha, bul asa kúrdeli másele emes. Ony qarastyrýǵa bolady. Sizder reportaj jasap, ministrler aitqan oidy halyqqa jetkize alady dep oilaimyn», - dedi Dáýren Abaev.
