QR Prezident ákimshiligi basshysynyń birinshi orynbasary Dáýren Abaev elimizdegi monoqalalardyń taǵdyryna qatysty óz pikirin bildirdi, dep habarlaidy QazAqparat.
«Monoqalalar Keńes dáýirinen qalǵan mura desek bolady jáne ol qalalar josparly ekonomika saiasatyna sai qurylǵan. Táýelsizdik alǵaly zaman ózgerdi, tiisinshe monoqalalardy basqarý printsipi de ózgerýi tiis. Búgingi tańda monoqalalardyń problemasy kóp. Qazirgi ýaqytta elimizde 27 monoqalada 1,5 mln adam turyp jatyr. Ol qalalardyń búgingi sipaty halyqtyń jappai kóshýi, áleýmettik depressiia, jumyssyzdyq ta bar. Oǵan azyp-tozǵan kommýnaldyq infraqurylymdy qosyńyz», - dedi Dáýren Abaev «Habar» telearnasynda ótken «Ashyq dialog» suhbatynyń kezekti sanynda.
Onyń aitýynsha, keibir monoqalalardy asyrap otyrǵan tabiǵi resýrstar qory azaiyp barady.
«Sondyqtan Prezident máseleni búginnen qolǵa alyp, bolashaǵy joq monoqalalardyń turǵyndaryn iri qalalarǵa kóshirýdi usynyp otyr. Árine, ol úshin aldymen jaǵdai jasaý kerektigin umytpaǵan jón. Biraq turǵyndardy kóshirý máselesi barlyq monoqalalarǵa qatysty emes. Damý bolashaǵy zor monoqalalar da bar. Áleýeti bar qalalar úshin arnaiy damý jospary qabyldanyp, ásirese ekonomikasyn ártaraptandyrý baǵyty boiynsha shara qolǵa alynady. Keibir monoqalalar iri qalalardyń mańynda ornalasqan, ondai qalalar aglomeratsiia printsipi boiynsha órkendei túsetin bolady», - deidi ol.
Sondai-aq, QR Prezident ákimshiligi basshysynyń birinshi orynbasary Memleket basshysy monoqalalarǵa qatysty aýqymdy taldaý jumysyn júrgizýdi tapsyrǵanyn aitty.
Taldaýdyń nátijesinde monoqalalar sanatqa bólinip, ol týraly BAQ betterinde habarlanatyn bolady.
