QR Aqparat jáne qoǵamdyq damý ministri Dáýren Abaev koronavirýspen aldyńǵy shepte kúresip júrgen mamandarǵa alǵys aitty, dep habarlaidy QazAqparat.
«Qazirgi ýaqytta koronavirýspen kúreste aldyńǵy shepte turǵan mamandarǵa - bizdiń dárigerlerge, tártip saqshylaryna, meiirbikeler men jedel járdem qyzmetkerlerine taǵy da alǵysym bildirgim keledi. Osyndai qiyn kúnderi kóptegen adamdar dárigerlerge degen kózqarasyn ózgertip, olardyń qoǵam ómirindegi róli men mańyzyn túsindi. Biz olardyń balalary, týystary men dostary bar ekenin jii umytyp ketemiz. Osy mamandar aýrý juqtyrý qaterine qaramastan, aianbai eńbek etip júr», - dedi ministr «Habar» telearnasyndaǵy «Ashyq dialog» baǵdarlamasynda.
Sonymen birge, ministr ózge de salalardyń mamandaryn atap ótti.
«Árine, politsiia men Ulttyq gvardiia qyzmetkerlerin umytpaýymyz kerek. Olardyń qataryna áskeriler qosylyp jatyr. Olar da táýlik boiy sizder men bizdiń qaýipsizdigimizdi kúzetip tur. Sóz sońynda jýrnalisterge de alǵys bildirgim keledi. Qazirgi jaǵdaida halyqty obektivti aqparattandyrý jumysy óte jaýapty ári mańyzdy bolyp otyr. Qazir olardyń jumys kestesi tyǵyz ekenin bilemiz, tipti redaktsiiada túneýge májbúr. Olardyń jedeldiginiń arqasynda kóp jaǵdaida dúrligýge jol bermedik», - dedi D. Abaev.
