QR Prezidenti Ákimshiligi Basshysynyń birinshi orynbasary Dáýren Abaev Qazaqstan men Frantsiia arasyndaǵy atyshýly fýtbol matchy týraly pikir bildirdi, dep habarlaidy QazAqparat.
«13 qarashada Parijde Frantsiia - Qazaqstan fýtbol matchy ótti, onda Qazaqstan 8:0 esebimen oisyrai jeńildi. Muny bizdiń otandastarymyz óte aýyr qabyldady. Kópshiligi elimizdegi fýtboldy qarjylandyrýdy toqtatýdy talap etti», - dedi «Habar» arnasynda «Ashyq dialog» baǵdarlamasynyń júrgizýshisi Dáýren Abaevqa.
«Iá, osy match qorytyndysyna jaýap qatqandar kóp boldy. Árine úlken eseppen jeńilý óte aýyr. Quramanyń ózi barlyq oqiǵadan qorytyndy shyǵarady dep oilaimyn. Eshkimdi synaǵym kelmeidi. Jigitter onsyz da kóp nárse estidi – ásirese jaǵymsyz pikirler kóp boldy. Alda qyrýar jumys bar. Eńseni túsirmeý kerek. Bul rette irikteý kezeńinde quramamyz jaqsy oiyn kórsetti. Ýkrainamen eki matchta, Bosniia jáne Gertsegovinamen qonaq matchyn oinaǵanda bárimiz qýanyp, qol shapalaqtadyq. Árine, bul deńgei aýa raiyna, ótetin ornyna, kúntizbelik júktemege qaramastan únemi saqtalýy kerek. Osyndai deńgeige únemi umtylý qajet. Fýtbol federatsiiasy da, Qazaqstan quramasy da muny jaqsy túsinedi», - dedi QR Prezidenti Ákimshiligi Basshysynyń birinshi orynbasary.
Sonymen birge Abaev fýtboldy qarjylandyrýǵa qatysty suraqqa jaýap berdi.
«Bul jerde Prezident kásibi sportty qoldaýdan buqaralyq balalar sportyna basa nazar aýdarýdy tapsyrdy. Bul baǵyttaǵy jumys qazirdiń ózinde júrip jatyr. Biraq biz qazaqstandyq fýtboldy qoldaýdan tolyq bas tartýǵa bolmaitynyn túsinýimiz kerek. Fýtbol – álemdegi eń tanymal sport túri. Fýtboldy elemei, buqaralyq jáne balalar sportyn damytý múmkin emes shyǵar. Óitkeni, eń daryndy balalar úshin kásibi klýbtarda oinaý jaqsy yntalandyrý bolar edi», - dedi ol.
