QR Aqparat jáne kommýnikatsiialar ministri Dáýren Abaev «Habar» telearnasynyń «Ashyq dialog» jobasy aiasynda ótken aptanyń eń kóp talqylanǵan máselelerine qatysty óz pikirin bildirdi. Mekeme basshysy qazaq tiline qatysty máselelerdi jariialaý aiasyndaǵy otandyq BAQ-tyń pozitsiiasyna tań qalatynyn aitty, - dep habarlaidy QazAqparat.
«Qazaq tili men qazaq ádebietine qatysty barlyq dúnieler árdaiym ótkir bolmaq. Bilim jáne ǵylym ministrligi barynsha tolyq túsinikteme berdi. Olar, kerisinshe, synaq tapsyrýdaǵy qazaq tiliniń rólin kúsheitti. Ázirge BǴM UBT-ny ekige bóldi: mekteptegi bitirý emtihandary jáne JOO-ǵa túsý emtihandary. Mektep bitirý emtihandarynda qazaq tili qaldy jáne ol attestatqa yqpal etetin bolady. Mektep bitirýshilerdiń sany ýniversitetke túsetinder sanynan áldeqaida kóp, sondyqtan qazaq tiliniń mártebesi ósedi», - dedi ministr.
Ótken aptadaǵy barlyq aqparattar aǵynynan Dáýren Abaev almatylyq Viacheslav Popovtyń málimdemesin erekshe atap ótti. V.Popov Feisbýktaǵy paraqshasynda jarty jylda qazaq tilin úirenip alýǵa nietti ekenin jazdy.
«Men jeke ózim úshin Viacheslav Popovtyń qazaq tilin úirený týraly málimdemesin túrtip aldym. Bul umtylysty únemi baqylaityn bolamyn. Bizdiń qoǵamda qazaq tili oqytylmai jatyr degen másele qyzý talqyǵa túsedi, biraq azamattardyń qazaq tilin óz betinshe úirenýge jasaǵan umtylystary kóleńkede qala beredi. Aqparat jáne kommýnikatsiialar ministri retinde meni bul másele tańǵaldyrdy», - dedi ministr.
