Aqparat jáne qoǵamdyq damý ministri Dáýren Abaev «Habar» arnasyndaǵy «Ashyq dialog» baǵdarlamasynda 29 mamyrda ótken sailaýaldy teledebatqa qatysty pikir bildirdi, dep habarlaidy QazAqparat.
Baǵdarlama júrgizýshisi ministrge «Úsh kandidat qatyspaǵan teledebatty tabysty ótti dep esepteýge bola ma?» degen suraq qoidy.
«Meniń oiymsha, debat oidaǵydai ótti, keibir kandidattar qatyspasa da, olardyń ókilderimen másele bolǵan joq. Senimdi ókilder retinde jai adamdar kelgen joq, úsh partiianyń jetekshileri keldi. Debatqa qatysýdyń da erikti túrde júrgiziletinin eskergen jón. Kandidattyń atynan senimdi ókildiń debatqa qatysýy - álemde bar tájiribe. Onyń sebepteri de ártúrli bolady. Máselen, Qasym-Jomart Toqaevtyń siiaqty kandidat bos bolmaýy múmkin. Prezident EAEO joǵarǵy ekonomikalyq keńesiniń otyrysyna qatysty», - dep túsindirdi Dáýren Abaev.
Onyń aitýynsha, keibir kandidat debatty tiimdi qural dep sanamaýy múmkin jáne onyń baǵdarlamasy men saiasi salmaǵy qarsylastarynan asyp túsip jatady. Sondyqtan, pikirtalasqa túspeýdi uiǵarady. Álemde mundai tájiribe kóptep kezdesedi.
«Kandidattardyń tikelei efirge shyǵyp sóileýi debat úshin tiimdi boldy. Bul oqiǵa qoǵamdyq talqylaý júrgizý men óz ustanymyn qorǵai alýdyń mańyzdy ekenin kórsetti. Munda barlyq qatysýshynyń naqty tujyrymdalǵan máseleler tiziminiń bolǵanyn atap ótken jón», - dedi ministr.
Eske sala ketsek, keshe QR Prezidenttigine úmitkerler arasynda televiziialyq pikirtalas ótti. Kandidattar úsh raýndta suraqtarǵa jaýap berip, óz baǵdarlamalaryn tanystyrdy.
