Qazaqstandyqtardyń mádeni suranysyn tolyqtai qamtamasyz etý úshin taǵy 300-den astam nysan ashý qajet. Bul týraly QR Mádeniet jáne sport ministri Dáýren Abaev vedomstvonyń mádeniet, arhiv isi jáne baspa máselelerine arnalǵan keńeitilgen alqa májilisinde málim etti, dep habarlaidy QazAqparat.
«Búginde elimizde 7637 mádeni nysan jumys istep tur. Taǵy da 300-den astam mekemege suranys bar. Ondai qajettilik negizinen aýyldarda sezilip otyr», -dedi ministr.
Vedomstvo basshysy bul nysandardy salmas buryn jergilikti halyqtyń pikirine qulaq asý kerektigin eskertti.
«Dei turǵanmen, salada jumys isteitin úkimettik emes uiymdar mundai mekemelerdiń kópshiligi turǵyndardyń talap-tilegin eskermei salynatynyn aitady. Sonyń saldarynan salynǵan mekeme qańtarylyp, bos turady. Sol úshin josparlaǵan kezde turǵyndar pikirin eskerý mańyzdy.
Osy jiynǵa óńirlerdiń ókilderi qatysyp otyr. Sizderden osy máselege basa nazar aýdarýlaryńyzdy suraimyn. Mysaly, keibir mektepterdiń janynda keremet kitaphanalar bar. Sony eskermesten, biz álgi eldi mekenge kitaphana salamyz. Onyń ornyna klýb salsa, áldeqaida tiimdi bolar edi. Osyndai máseleler óte kóp», - dedi Dáýren Abaev.
