Ulttyq tarihshylar kongresiniń VIII otyrysynda QR Prezidenti ákimshiligi basshysynyń birinshi orynbasary Dáýren Abaevtyń quttyqtaý haty oqyldy, dep habarlaidy QazAqparat.
«Biyl ultymyzdyń aqyl-oiy men abyroiyna ainalǵan birtýar tulǵalarymyzdyń mereitoiyn jáne memlekettilik bastaýynyń airyqsha kezeńin joǵary deńgeide atap óttik. Biz úshin Ábý Nasyr ál-Farabidiń 1150 jyldyq, Abaidyń 175 jyldyq mereitoilary jáne «Ulyq Ulys» – Altyn Ordanyń 750 jyldyǵy rámizdik meiram sanalady» delingen QR Prezidenti ákimshiligi basshysynyń birinshi orynbasary Dáýren Abaevtyń quttyqtaý hatynda.
Sondai-aq, ol tarihymyz ben ádebietimizge tyń kózqaraspen qaraý jáne ony urpaqqa jetkizý - basty mindetimizdiń biri ekenin aitty.
«Bul rette Qazaqstan Ulttyq tarihshylar kongresiniń búgingi sharasy tarihi jyldyń taǵylymyn jańasha baǵalaýǵa úles qosary anyq. Sizderdiń tarih ǵylymynyń jańashyl ádistemesi týraly pikirlerińiz qoǵamdyq sanany qalyptastyryp, tulǵataný salasyndaǵy ǵylymi zertteýlerdiń tiimdiligin arttyrý úshin asa mańyzdy. Kongress usynatyn ustanymdar men tujyrymdar tyń zertteýlerge muryndyq bolyp, halqymyzdyń rýhani murasyn tolyqtyrýǵa yqpal eteri sózsiz. Kongreske qatysýshylarǵa jemisti eńbek tileimin», - deidi ol.
