Dáýren Abaev Almaty qalasyndaǵy mádeniet nysandaryn aralady, dep habarlaidy "Ult aqparat" ministrliktiń baspasóz qyzmetine silteme jasap.
«Búgin QR Mádeniet jáne sport ministri Dáýren Abaev Jambyl atyndaǵy Qazaq memlekettik filarmoniiasyna, Qazrestavratsiiaǵa, Ulttyq kinony qoldaý memlekettik ortalyǵyna, Qazaqstan Respýblikasynyń Ortalyq memlekettik mýzeiine, Qurmanǵazy atyndaǵy Qazaq ulttyq konservatoriiasyna, Muhtar Áýezov atyndaǵy Qazaq ulttyq drama teatryna, M.Lermontov atyndaǵy memlekettik akademiialyq orys drama teatryna, Sh. Aimanov atyndaǵy «Qazaqfilmge», QR Memlekettik akademiialyq bi teatryna jáne Respýblikalyq akademiialyq nemis drama teatryna bardy», - delingen atalǵan ministrliktiń baspasóz qyzmeti taratqan aqparatta.
Vedomstvo málimetinshe, ol ministrlikke baǵynysty uiymdardyń ujymdarymen kezdesip, áńgimelesti. Sonymen qatar qańtar oqiǵasy kezinde mádeniet oshaqtaryna keltirilgen zalaldy qarap shyqty.
Kezdesý barysynda ministr qandai jaǵdai bolmasyn, Almaty árqashan elimizdiń mádeni astanasy bolyp qala beretinin atap ótti.
«Qalanyń mýzei, arhiv, kitap qorlarynyń bailyǵy, teatr jáne kontserttik repertýarlardyń alýan túrliligi, qalada jasampaz jastardyń, óner salasy qyzmetkerleriniń shoǵyrlanýy – árqashanda bolǵan jáne jalǵasyn taba beredi. Endigi jerde biz eki ese kúsh- jigermen ońtústik astananyń mádeni landshaftyn damytý men túrlendirýge jumys isteýge tiispiz. Bul iste sizderdiń kómekterińiz, qoldaýlaryńyz sózsiz qajet», - dedi Abaev mádeniet nysandary qyzmetkerlerine arnaǵan sózinde.
Sonymen qatar kezdesý barysynda mekeme basshylaryna birqatar naqty tapsyrmalar berildi. Atap aitqanda, bai dástúr men jyldar boiy qalyptasqan repertýardy jańa tásildermen, shyǵarmashylyq eksperimenttermen, jas rejisserlerdiń, stsenaristerdiń, dramatýrgterdiń, kompozitorlardyń jańa tolqyn ókilderimen yntymaqtastyqpen bailanystyrý qajet ekendigi aityldy.
Osy turǵyda Ministr teatr men kinonyń tereń maǵynalyq, ideologiialyq mánine erekshe nazar aýdardy.
«Búgin bizdiń aldymyzda elimizdiń jastary úshin oń róldik modelderdi qalyptastyrý baǵytynda mańyzdy mindet tur. Jańadan kúrdeli dúnieni oilap tabýdyń qajeti joq. Munyń bárin Uly aqyn, dana oishyl, qazaqtyń jańa tarihi dáýirdegi realistik jazba ádebietiniń atasy Abai Qunanbaiuly áldeqashan aityp ketken. Uly aqynnyń ǵibratty sózderi jáne danalyq uiyǵan oilary men tujyrymdamasy barlyq qajettilikti qamtidy – táýelsizdik, adaldyq, ózin-ózi jetildirýge degen umtylys, ádilettilik pen adamgershilik sezimderi. Bul qundylyqtardy otandyq filmder men spektaklderdiń siýjettik jelisine engizý qajet», - dep atap ótti ministr.
Sonymen qatar Muhtar Áýezovtiń týǵanyna 125 jyl mereitoiyn laiyqty deńgeide atap ótý, Uly prozaiktiń esimimen atalatyn drama teatr ǵimaratyna kúrdeli jóndeý júrgizý jóninde jeke tapsyrmalar berildi.
Jambyl atyndaǵy filarmoniiada ministr «Otyrar sazy» orkestriniń 40 jyldyǵy men 2025 jyly Nurǵisa Tilendievtiń 100 jyldyǵyn merekeleý máselesin talqylaýdy usyndy.
«Qazaqfilmdi» aralaý barysynda ministr kinofabrikany jańǵyrtý jumystarynyń barysymen tanysyp, «Uly dala tańy» filminiń kórsetilimine qatysty.
