QR Aqparat jáne kommýnikatsiialar ministri Dáýren Abaev qoǵamda birshama shý týǵyzǵan VLKSM-niń 100 jyldyǵyn atap ótý sharasyna qatysty óziniń pikirin bildirdi, dep habarlaidy QazAqparat.
«Siz aityp otyrǵan sharany (júrizýshige qarata - avt.) múshelik jarnanyń jiynymen jáne (bálkim - Abaev) demeýshilik aqshamen Qazaqstannyń kommýnistik partiiasy uiymdastyrǵan. Memlekettik biýdjetten bir tiyn da shyqqan joq», - dedi Dáýren Abaev «Habar» arnasyndaǵy «Ashyq dialog» baǵdarlamasynda.
Ministr óz sózinde sonymen birge, komsomol kúnin atap ótý Alash avtonomiiasynyń 100 jyldyǵyn kóleńkesinde qaldyrdy degen pikirge qatysty oiyn aitty.
«Bul - tolyǵymen shyndyqqa sáikes kelmeidi. Bir jaǵynan birneshe júz adam teatrdyń birinde shara ótkizedi de, ekinshi jaǵynan jyl boiy elimizdiń barlyq aimaqtarynda Alashtyń 100 jyldyǵyna arnalǵan sharalardyń tolyqqandy kesheni uiymdastyrylady», - dedi ministr.
Dáýren Abaev óz sózi dáleldi bola túsý úshin birneshe mysal keltirdi. «Birinshiden, Alash qozǵalysynyń 100 jyldyǵyna orai 12 seriialyq «Tar zaman» serialy túsirildi. Ol «Qazaqstan» ulttyq arnasynda kórsetildi.
Sonymen birge, kinoteatrlarda onyń tolyqmetrajdy nusqasy berildi. Dál sol sekildi birneshe filmniń túsirilgenin atap ótý kerek. Onyń ishinde «Alash týy astynda» atty derekti filmdi de aita ketýge bolady. Memleket qarjysynyń esebinen Semei qalasynda Álihan Bókeihannyń eskertkishi ornatyldy. «Alash arystary» mýzeiiniń ekspozitsiialary jańartyldy. Tipti Alash qozǵalysy týraly birqatar kitap shyqty. BAQ-ta birshama material jariialandy», - dedi ministr.
Dáýren Abaev sonymen birge, ótken jyldyń qyrkúiek aiynda Alashordanyń 100 jyldyǵyna arnalǵan iri halyqaralyq ǵylymi-praktikalyq konferentsiia ótkenin eske saldy. «Esterińizde bolsa, ol sharaǵa Qazaqstan Respýblikasynyń Memlekettik hatshysy Gúlshara Ábdihalyqova qatysyp, Memleket basshysynyń quttyqtaý sózin oqyp bergen bolatyn», - dedi Dáýren Abaev.
Ministr sonymen birge, komsomol kúnin atap ótý sharasynda «Rýhani jańǵyrý» baǵdarlamasynyń logotipi ilinip turǵanyna qatysty pikirin aitty.
«Men bul rette Qoǵamdyq damý ministri Darhan Kaletaevtyń pikirimen tolyq kelisemin. Bizde túimedei nárseni túiedei etetin daǵdymyz baiqalyp qalyp jatyr. Bunymen kúresý kerek. Mundai asyra silteýden memleket te, qoǵam da utpaitynyn túsiný kerek. Men taǵy da qaitalaimyn: VLKSM-niń 100 jyldyǵyn atap ótý - memlekettiń ideologiialyq saiasatymen ortaq túgi joq. Bul burynǵy komsomoldardyń qatysýymen ótken jeke shara bolatyn. Ony eski dostardyń nemese túlekterdiń kezdesýimen ǵana salystyrýǵa bolady. Odan artyq emes», - deidi ol.
Dáýren Abaev óz sózinde ashyǵyn aitqanda komsomol Qazaqstan úshin ótken kúnde qalǵanyn atap ótti.
«Biraq, ol ótken zamanda qazaqstandyqtardyń tolyǵymen býyny ómir súrgen. Biz buny joqqa shyǵara almaimyz. Komsomol arqyly ótken adamdardyń bizdiń elge sińirgen eńbegin de jasyra almaimyz. Qazir bul sharany synap jatqandardyń kóbiniń ózi de komsomol bolǵan. Al bul shara - saiasi jiyn nemese kommýnizmge degen nostalgiia emes, bul - jastyq shaqtaryn eske alǵan adamdardyń kezdesýi», - dedi Dáýren Abaev.
