QR Aqparat jáne kommýnikatsiialar ministri Dáýren Abaev Elbasynyń «Rýhani jańǵyrý» baǵdarlamasy aiasynda «100 jańa esim» jobasy nelikten biyl qaitadan ótkiziletinin aityp berdi, dep habarlaidy QazAqparat tilshisi.
Dáýren Abaev biylǵy joba týraly QR Prezident Ákimshiliginiń basshysy Áset Isekeshevtiń tóraǵalyǵymen ótip jatqan Qoǵamdyq sanany jańǵyrtý baǵdarlamasyn júzege asyrý boiynsha ulttyq komissiianyń kezekti otyrysynda aitty.
«Búginge deiin monoqalalar men aýdan ortalyqtarynyń bárin qosqanda elimizdiń barlyq óńirlerinde joba jeńimpazdarynyń qatysýymen 300-ge jýyq shara ótkizildi. Olardyń keibiri júieli sipatqa ie bolyp, kommýnikatsiia úshin tiimdi alań retinde ózin tanyta bildi. Joǵaryda atalǵan jobalar men bastamalardyń tabysty júzege asyrylýy Memleket basshysynyń baǵdarlamasyndaǵy ideianyń negizin qoǵamda tanyta túsýge múmkindik berdi. Osy jyly aqparattyq keńistikke júrgizilgen monitoring men halyqtyń myńdaǵan usynysy jobany ary qarai jalǵastyrý týraly áleýmettik suranystyń baryn kórsetip berdi. Bul rette elimizdiń azamattyq sektory erekshe ustanymyn tanytqanyn atap ótý kerek. Osyǵan bailanysty ministrlik QHA-men birlese otyryp, «100 jańa esim» jobasynyń ekinshi kezeńin júzege asyryp jatyr», - deidi Dáýren Abaev.
Ministrdiń aitýynsha, bul jolǵy jobanyń basty ereksheligi - izdeýde jáne irikteýde úkimettik emes sektordan úmitkerlerdi tabý sekildi institýtsionaldyq ádis qoldanyp otyr.
«Sonymen qatar, álbette, ózin-ózi usyný múmkindigi de bar. Osy jyldyń 3 qyrkúiegi men 25 qazany aralyǵynda 2 388 ótinim kelip tústi. Aimaqtyq úles boiynsha elimizdiń barlyq óńirleri atsalysyp jatyr. Ásirese, erekshe belsendilikti Qaraǵandy, Shyǵys Qazaqstan, Mańǵystaý oblystary men Astana, Almaty qalalarynan baiqaýǵa bolady», - deidi Dáýren Abaev.
Ministr atap ótkendei, jobaǵa jastardyń da qyzyǵyp otyrǵany qýantady. Dáýren Abaevtyń aitýynsha, qazirdiń ózinde bul sanatta qoǵamnyń nazaryna ilikken jandar barshylyq.
«Máselen, Indira Ádilbaeva degen boijetken basketbol boiynsha erekshe qajettiligi bar balalarǵa jattyqtyrýshy bolyp júr. Sondai-aq, Larion Ian kliningti kompaniiany jasaqtap, qazir qol astyndaǵy 5 myń adamdy jumyspen qamtyp otyr. Erdos Tólegenov degen taǵy bir jigit «Oila» atty balalardyń ǵylymi jýrnalyn shyǵardy. Ol jýrnal qazirgi tańda Germaniia men Lihtenshtein men Liýksembýrgte, Niderlandy men Shveitsariiada, v Aýstraliia men Jańa Zelandiiada, sondai-aq Ońtústik Koreiada shyǵarylyp jatyr. Ol qaziri tańda franshizany satyp jibergen. 20 myń danamen shyǵatyn bul jýrnal óte qyzyqty. Sol sekildi Aidos Esmaǵambetov - silikonnan músin jasaityn erekshe músinshi. Ony tipti madam Tiýsso murajaiy shaqyrypty. Doibydan álemniń on bir dúrkin chempiony Marat Jikeev degen myqty adam bar. Mine, jobany jalǵastyrýǵa turarlyq ainalamyzda qanshama kisilerdiń baryn bilip otyrmyz», - deidi ministr.
Dáýren Abaev atap ótkendei, uiymdastyrýshylar naqty 100 adamdy emes, sapaǵa mańyz berý úshin myqty degen 20 adamdy irikteýdi kózdep otyr.
«Úmitkerlerge baǵa berý úshin arnaiy Sarapshylyq keńesi qurylady. Jobaǵa qatysýshylar eń sońynda onlain daýys berý arqyly irikteledi. Ol daýys berý 1-15 qarasha aralyǵynda ótedi. Al 1-5 jeltoqsan aralyǵynda «100 jańa esimge» engen adamdardy kópshilikke tanystyratyn bolamyz», - deidi Dáýren Abaev.
Eske sala ketsek, buǵan deiin Qazaqstanda «100 jańa esim» jobasynyń ekinshi kezeńi bastalǵanyn habaraǵan bolatynbyz.
