© Photo: Qazaqstan Respýblikasynyń Ulttyq ulany
Qorǵanys ministri Rýslan Jaqsylyqov depýtat Dáýlet Turlyhanovtyń uly Nurasyl Bolattyń áskeri bólimnen qashyp ketýine qatysty pikir bildirdi, dep habarlaidy "Ult aqparat" Sputnik Qazaqstan saityna silteme jasap.
Aitýynsha, ol áskeri qýdalaý organdarynyń sheshimimen qolbasshylyqtyń baqylaýynda bolǵan. Gaýpvahtadan shyǵyp, áskeri bólimge kele jatqanda óz erkimen ketip qalǵan.
"Tártiptik jarǵyǵa sáikes, ol jazalanady. Qaitalap aitamyn, ásker - jas qylmyskerlerdi qamaýda ustaityn koloniia emes. Bizdiń fýnktsiiamyz múlde basqa. Bul – tárbieden ketken olqylyq. Biz ony túzete almaimyz. Bizdiń fýnktsiiamyz basqa.
...Onyń áskeri bólimnen ketip qalýyna jol bergen ofitserler tártiptik jazaǵa tartylady. Al áskeri qyzmetshige qatysty jazany sot anyqtaidy. Gaýptvahtaǵa qamalýy múmkin", - dedi Jaqsylyqov Úkimet kýlýarynda.
Eske sala keteiik, keshe Dáýlet Turlyhanovtyń uly áskeri bólimnen qashyp ketkeni týraly aqparat tarady. Qatardaǵy jaýynger B. Qonaev garnizonynyń áskeri bóliminde qamaýǵa alý merzimi aiaqtalǵannan keiin áskeri bólimniń ornalasqan jerine qaityp bara jatqan kezinde belgisiz baǵytta ketip qalǵan.
Ol buiryqqa baǵynbai, ony oryndamaǵany úshin gaýptvahtada ustaý túrinde ákimshilik jaýapqa tartylǵan. Áskeri bólimge áskeri qyzmetshimen birge qaityp bara jatqan.
Kóp uzamai Qorǵanys ministrligi áskeri qyzmetshiniń tabylǵanyn habarlady. Ol qyzmet atqaratyn ornyna jetkizildi. Atalǵan fakti boiynsha qyzmettik tekseris júrgizilip jatyr.
Aita keteri, Dáýlet Turlyhanov – segizinshi sailanǵan Parlament Májilisiniń depýtaty.
