QR tsifrlyq damý, innovatsiialar jáne aeroǵarysh ónerkásibi ministriniń buiryǵymen Dáýlet Nysanqululy Bekmanov Tsifrlyq damý, innovatsiialar jáne aeroǵarysh ónerkásibi ministrliginiń Memlekettik qyzmetter komitetiniń tóraǵasy qyzmetine taǵaiyndaldy. Bul jóninde primeminister.kz portalyna silteme jasap "Ult aqparat" habarlaidy.
Dáýlet Bekmanov 1983 jyly Ózbekstan Respýblikasynyń Dostyq qalasynda dúniege kelgen.
2004 jyly - «Miras» ýniversitetin, 2010 jyly - M. Áýezov atyndaǵy Ońtústik Qazaqstan memlekettik ýniversitetin támamdaǵan.
Eńbek jolyn 2005 jyly jeke kompaniiada injener-júie tehnigi bolyp bastaǵan.
2006 jyldan bastap 2011 jylǵa deiin memlekettik jáne kommertsiialyq uiymdarda ártúrli laýazymdarda eńbek etken.
2011 jyldyń qazan aiynan bastap memlekettik qyzmette jumys isteidi. Bailanys jáne aqparat ministrliginde, Kólik jáne kommýnikatsiialar ministrliginde, QR Bailanys jáne aqparat agenttiginde, QR Investitsiialar jáne damý ministrliginde memlekettik qyzmetterdi avtomattandyrý salasynda basshylyq laýazymdardy atqarǵan.
2016 jyldyń maýsymynan bastap 2018 jyldyń qyrkúiegine deiin — QR Aqparat jáne kommýnikatsiialar ministrliginiń Memlekettik qyzmetterdi damytý departamenti direktorynyń orynbasary, Aqparattandyrý departamentiniń direktory.
2018 jylǵy qyrkúiekte «Ulttyq aqparattyq tehnologiialar» AQ basqarma tóraǵasynyń orynbasary bolyp taǵaiyndaldy.
