Jekelegen azamattardyń «Qazaq tili álipbiin latyn grafikasyna kóshirýde meniń nusqam bekitiledi» dep jar salýy - qate pikir. Bul týraly QR Mádeniet jáne sport vitse-ministri Nurǵisa Dáýeshov aitty, dep habarlaidy "Ult aqparat".
«Qazaq tili álipbiin latyn grafikasyna kóshirý jumystary Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasy aiasynda jariialanyp, qarqyndy jumystar júrgizilgen bolatyn. Ózderińizge belgili, sol ýaqyttan beri latyn grafikasyna kóshirý boiynsha birqatar jumystar atqaryldy. QR Úkimetiniń janynan Ulttyq komissiia, tiisti vedomstvolardyń janynan olardyń jumys toptary qurylyp, jańa álipbi men emle erejeleri zerdelenýde. Jańa álipbige kóshý máselesiniń jalpy jurtshylyq tarapynan qyzý talqyǵa túsýi de máseleniń ózektiligin aiqyndap otyr», - dedi «Jańa álipbi: emle, ádisteme jáne halyqaralyq tájiribe» taqyrybyndaǵy respýblikalyq konferentsiia jumysyn ashqan vitse-ministr.
Onyń atap ótýinshe, búgingi uiymdastyrylyp otyrǵan konferentsiia osy jumystardy ortaǵa salyp zerdeleýge, aldaǵy ýaqytta atqarylýy tiis mindetterdi talqylaýǵa múmkindik beretin alań sanalady.
«Osy rette QR Prezidenti Qasym-Jomart Toqaevtyń osy jylǵy 21 qarashada qoldanystaǵy latyn grafikasyndaǵy álipbidi jetildirýdiń qajettigi jónindegi tapsyrmasyn esterińizge sala ketkim keledi. Búgingi shara barysynda da osy tapsyrmalardy basshylyqqa alyp, jumys júrgizýlerińizdi suraimyz. Memleket basshysynyń bergen tapsyrmasyna sáikes, qazirgi tańda qazaq tilin latyn álipbiine kóshirý máselesinde osyndai alqaly májilisterdiń ótýi zańdy jáne bul turǵyda sizderden ministrlik tarapynan úlken ótinishpen suralatyn másele úlken aqiqatpen qaraýymyz kerek», - dedi ol.
Osy rette vitse-ministr mundai sharalar barysynda jańa álipbige qatysty tehnikalyq jaǵynan, jazý jaǵynan ártúrli máseleler jan-jaqty talqylanatyndyǵyn atap ótti. Qazaqstandaǵy jekelegen azamattardyń óz álipbilerin usynýyna bailanysty olardy qoǵamdyq pikirge salyp, ǵalymdardyń arasynda talqylaý boiynsha jumystar júrgizilip jatqanyn eske saldy.
«Biz úlken tarihi kezeńde turyz. Tilimizdiń, ultymyzdyń tarihi kezeńinde turǵannan keiin bul máselege osy eldiń azamaty retinde úlken jaýapkershiliken qaraýymyz kerek dep oilaimyn. Árbir usynylǵan jańa álipbige ǵalymdar tarapynan naqty, aiqyn, shynaiy baǵa berilgen jaǵdaida bolashaǵymyzdyń jarqyn bolatyndyǵyna tolyq senemin. Keibir BAQ-ta jekelegen álipbi qurǵan azamattar: «Meniń álipbiimdi qoldady, bekitedi» degendi aitýda. Bul qate pikir. Bizge latyn álipbiine kóshýge bailanysty qansha ýaqyt qajet bolsa, sonsha ýaqyt bólinedi», - dedi Nurǵisa Dáýeshov.
