QR Parlamenti Senatynyń depýtaty Murat Baqtiiaruly búgingi Prezident Joldaýyna qatysty pikir bildirdi, dep habarlaidy "Ult aqparat" Senattyń baspasóz qyzmetine silteme jasap.
«Búgin qos palatynyń birikken otyrysyna Prezident qatysyp, halyqqa Joldaýyn arnady. Osy oraida men úsh máselege toqtalǵym kelip tur. Birinshisi, bilim salasy. Ásirese úzdiksiz bilim berýge erekshe mán berildi. Prezident qazirgi qalyptasqan onlain bilim berý júiesine qatysty óziniń syni pikirin aitty. Biz eldi aralaǵanda bul máseleni kótergenbiz. Qazir biz qalyptasqan dástúrli bilim berýdi jalǵastyrý máselesin qaraýymyz kerek. Meniń oiymsha, ata-analardyń kelisimimen balalardy dástúrli bilim berýge kóshirýge múmkindik bar dep esepteimin» deidi Murat Baqtiiaruly.
Onyń aitýynsha, ekinshi másele - jergilikti ózin-ózin basqarý. Bul baǵyttaǵy zań bizde bar, biraq formaldy túrde qoldanylyp kelgen.
«Prezident osy máselege airyqsha nazar aýdaryp, aýyl ákimderin halyqtyń pikirine súiene otyryp sailaý máselesin aldaǵy jyly engizý qajet ekenin aitty. Joldaýda ulttyq qundylyqtar máselesi de kóterildi. Memleket basshysy keleshek adal, bilimdi, kásipke beiim urpaq tárbieleý isine aralasýdy barlyq qoǵamdyq institýttarǵa júktedi. Parlament óz tarapynan Prezidenttiń tapsyrmalarynyń zańdyq turǵyda tujyrymdalýyn jan-jaqty qaraityn bolady.
